Само Бугарија, Турција, Индија и Кина купуваат руска нафта од танкери

Министерството за енергетика на Русија одлучи да се бори против попустите на руската нафта со следење на нафтените договори откако цената на клучната руска класа Урал падна под критичните 40 долари за барел, соопшти Интерфакс.

Министерството потсетува дека декретот на рускиот претседател Владимир Путин забранува снабдување со нафта според договори кои предвидуваат примена на „ценовниот плафон“, кој беше воведен од земјите на Г7 на 5 декември 2022 година, ограничувајќи ја цената на руската нафта на 60 долари за барел.

На 6 јануари цената на руската нафта од Урал, испорачана од пристаништето Приморск во Балтичкото Море, падна на 38,7 долари за барел, објави Блумберг, цитирајќи ги податоците на агенцијата за цени Аргус. Ова е најниската вредност од пролетта 2020 година. Сегашните цени на класата Урал се речиси двојно пониски од Брент (78,57 долари од 6 јануари) и една третина под „ценовниот плафон“ на Запад.

Од воведувањето на ембаргото на нафтата и „ценовниот плафон“ на 5 декември 2022 година, руската нафта речиси се преполови, додека Брент поевтини за 18%. На Русија ѝ останаа само четири купувачи на нафта по морски пат: Бугарија, Турција, Индија и Кина. Севкупно, од почетокот на ембаргото за нафта, земјата загуби 20% од извозот на нафта.

Министерството за финансии во буџетот за 2023 година ја вклучи цената на Урал од 70 долари за барел, но за да може приходите да ги покријат сите трошоци, нафтата мора да чини повеќе од 100 долари, забележува Алфа-банк. Затоа, цените на нафтата околу 40 долари се „вистинска катастрофа“ за рускиот буџет, вели Евгениј Суворов, економист во Центрокредит банка.