Руската Дума го усвои законот со кој Путин може да остане претседател до 2036

Долниот дом на рускиот парламент, Думата, денеска во третото и последно читање донесе закон со кој се дозволува рускиот претседател Владимир Путин повторно да се кандидира за претседател. Тој ќе може да се кандидира за оваа позиција уште двапати и евентуално да остане на чело на земјата до 2036 година, пишува француската новинска агенција АФП.

Донесувањето на законот беше оправдано со усогласување на изборното законодавство со амандманот на Уставот, кој е во сила од минатото лето по неговото одобрување на референдум. Оттогаш, уставот вклучува амандман кој овозможува Путин, 68, да биде реизбран, иако неговиот мандат истекуваше во 2024 година. Уставот сè уште го ограничува претседателскиот мандат на два последователни мандати, но амандманот предвидува претседателите на земјата што беа на функција пред влегувањето во сила на амандманот.

Законот усвоен денес предвидува и руски граѓани над 35 години да можат да се кандидираат за претседател, под услов да живеат во Русија најмалку 25 години и да немаат странско државјанство или дозвола за престој во странство, објави руската агенција Тасс.

Путин, кој дојде на власт во 2000 година, поднесе оставка на крајот на неговиот втор претседателски мандат во 2008 година. По четири години како премиер, тој беше реизбран за претседател во 2012 година, а потоа повторно во 2018 година.

Целиот пакет уставни измени донесе популарни мерки во јавноста, како што се минималната плата и прилагодувањето на пензиите на трошоците за живот, но исто така ги зајакна овластувањата на законодавниот дом, кој е цврсто во рацете на партијата на Путин, Единствена Русија. Покрај тоа, уставот воведе забрана за истополови бракови и споменување на вера во бога.