Доктори за пари глумат дека вакцинираат, лажните ковид пасоши „цветаат“

Илјадници Европејци кои не сакаат вакцини плаќаат за лажни ковид сертификати и до 500 евра

Додека Европската комисија и земјите на ЕУ се борат да го задржат најновиот пораст на инфекции со коронавирус, илјадници Европејци кои не сакаат вакцини плаќаат за лажни пропусници за ковид. Медиумите објавија дека проблемот постои во десетина земји, од Германија, каде што се продаваат фалсификати на Инстаграм, до Австрија, Италија и источноевропските и балканските земји. За лажен тест или неадминистрирана вакцина, цената варира од 100 евра до дури 500 евра, а понекогаш се плаќа во криптовалута.

„Јутарњи лист“ започна сопствена истрага и ги објави резултатите оваа недела. Весникот откри неколку ординации на општи лекари каде што може да се купат сертификати откако содржината на шприцот ќе се исфрли во воздухот. Овој метод е тешко да се открие бидејќи сè е направено според упатствата, освен последниот чекор. Најдобрата вакцина за измама е Џонсон и Џонсон бидејќи за сертификатот е потребна само една.

Хрват кој зборуваше за „Јутарњи лист“ под услов да остане анонимен, рече дека има „одбивност кон вакцинацијата“, но слушнал од пријател дека „тоа може да се реши за 1.000 куни (130 евра)“. Две недели подоцна, му било кажано да оди во лекарска клиника на јадранскиот брег. Се пријавил за вакцинација, влегол и ги ставил парите под книга ставена на масата – слепа точка каде што камерите за видео надзор не  покриваат, му рекле.

„Сестрата дојде, ми рече да го засукам ракавот, зеде памук, го натопи со алкохол и потоа зеде инјекција од Џонсон и Џонсон. Таа го доведе шприцот до моето рамо како да ме удира, но го исфрли во воздухот во близина на моето рамо. И тогаш таа ги внесе моите податоци во системот како да сум редовно вакциниран“.

Во бугарскиот главен град Софија, млад човек со лажен сертификат за вакцинација почина во болница на 26-ти ноември. Д-р Људмил Шопов од одделението за ковид во болницата рече дека пациентот одбил третман со кислород затоа што се плашел дека медицинскиот кислород ќе му ги оштети белите дробови.Овој  27-годишен маж, без никакви познати хронични заболувања, првично им кажал на лекарите дека е вакциниран и има зелен сертификат. Но, неговата состојба нагло се влошила и развил респираторна инсуфициенција, што ги натерало лекарите да се посомневаат во неговиот вакцинален статус. Откако разговарал со лекар приватно, пациентот признал дека неговиот сертификат  е лажен. Запрашан зошто не бил вакциниран, тој рекол дека се плашел дека вакцината може да го направи сексуално импотентен.

„Тој едноставно не сфати колку сериозно е болен“, рекоа лекарите.

Слична смрт беше пријавена во Романија, каде што медицински работник во Сучеава (североисточна Романија) почина од Ковид 19  во ноември, а подоцна беше откриено дека бил невакциниран и покрај тоа што имал потврда.

Извори на EURACTIV во Бугарија открија дека вообичаената цена на лажните сертификати е помеѓу 100 и 300 евра. Сертификатот од 300 евра е за странци, главно за оние од Северна Грција.

Бугарската полиција веќе спроведе неколку специјални операции во кои беа уапсени десетици Бугари осомничени дека имале или издавале лажни потврди за вакцини. Како и во Хрватска, некои бугарски лекари претпочитаат да ја користат вакцината Џонсон и Џонсон со единечна доза за издавање зелен сертификат. Документот е задолжителен за вработените во многу бизниси низ земјата.

Полицијата спроведе специјална операција во две болници во малите градови Аеновград и Раковски во јужна Бугарија вечерта на 29 ноември: тројца лекари и еден стоматолог беа уапсени, а во еден од нивните автомобили беа пронајдени неколку лажни потврди.

Двајца лекари се уапсени и во Словенија поради издавање лажни потврди, објави агенцијата СТА. Во полициската истрага беа вклучени повеќе од сто истражители од полициските одделенија во седум градови, извести во вторникот Бено Меглич, шеф на криминалните истражители на Марибор.

Во Германија, повеќето државни криминални агенции неодамна предупредија дека трговијата со лажни сертификати е значително зголемена по воведувањето на таканаречените 2G ограничувања (вакцинирани или опоравени).Од 27 ноември околу 2.500 случаи на лажни сертификати се откриени во Германија, од кои половината од случаите во Баварија, а сертификатите беа достапни преку Инстаграм.

На другиот крај на Европа, во Албанија, наставник изјави за Еурактив дека барањето за ПЦР тест „за патување“ е шифра што им сигнализира на лекарите да не го прават тестот правилно, туку само да го земат брисот надвор од носот и усните.

„Познавам повеќе луѓе со лажен сертификат отколку со вакцина“, рече наставникот.

Извор од ЕУ запознаен со ова прашање изјави  дека Европската комисија направила урнек за сертификатите за да бидат препознаени низ целиот блок, за кратко време, но со највисоки можни безбедносни стандарди.Технички секоја земја има различен контролен систем за издавање сертификати и затоа земјите-членки на ЕУ мора подобро да го контролираат пристапот до него, додавајќи дека измамите во такви случаи треба да се решат на национално ниво, како што веќе беше случај во многу земји.Со оглед на тоа што досега се издадени повеќе од 710 милиони сертификати во ЕУ, објаснува изворот, може да се очекуваат обиди за измама. Но, без дигитален сертификат, откривањето на измамата би било невозможно доколку има само хартиена верзија на различни јазици, заклучил изворот. (Еурактив)