Како Русија ги корумпираше врвните политичари во Австрија

Критиките за поранешните австриски политичари поради нивните врски со Русија се зголемија по инвазијата на рускиот претседател Владимир Путин на Украина. Веб-страницата на австриската јавна радио и телевизија објави обемен материјал за односите на некои австриски политичари со рускиот претседател Владимир Путин.

Особено критичен е односот кон поранешниот австриски канцелар и поранешен лидер на Австриската народна партија (ОВП) Волфганг Шисел, кој не сака да поднесе оставка како член на надзорниот одбор на рускиот нафтен концерн „Лукоил“, со образложение дека таа не е јавна, туку приватна компанија котирана на Лондонската берза. Неговиот сопартиец и претседател на Националниот совет, Долниот дом на парламентот, Волфганг Соботка, слично изјави на крајот на минатата недела.

„Прашањето Шисел“ создава тензии во партијата. Шефот на провинцијата Тирол, Гинтер Платер (ОВП), кој беше министер за одбрана во вториот кабинет на Шисел, одби да се приклучи на дебатата. Тој на прес-конференција рече дека прашањето „треба да се разговара во Виена на владино ниво“.

Поранешниот вицеканцелар и лидер на ОВП, Ерхард Бусек искажа остри критики, барајќи од неговиот наследник во партијата да се повлече. „Можам само да побарам од него да биде поконзистентен ако не сака да си го оцрни името“, рече тој и додаде: „Тоа што го прави во моментов не е достојно“. За Бусек не е логично да се расправа дека „Лукоил“ е приватна компанија. Во време на војна, компанија која тргува со енергија никогаш не е приватна. „А Волфганг Шисел е многу интелигентен. Грозно е да не смета дека сме толку глупави и да мисли дека му веруваме“.

Во вторникот, Социјалдемократска партија (СПО) повторно побара од федералниот канцелар Карл Нехамер (ОВП) да „зборува јасно“ со Шисел на оваа тема и да го убеди да поднесе оставка како член на надзорниот одбор на „Лукоил“ поради угледот. 

За партијата НЕОС, позицијата во „Лукоил“ и функцијата претседател на Австриското друштво за надворешни работи и Обединетите нации, на Волфганг Шисел, се некомпатибилни.

Поранешниот канцелар не е единствениот поранешен австриски политичар кој работи за руски концерн. Поранешниот австриски канцелар од социјалдемократите Алфред Гузенбауер беше експерт во Институтот за дијалог за цивилизациски студии близок до Кремљ, основан од Владимир Јакунин, поранешен претседател на руските железници и близок доверлив човек на Путин. Во интервју за австриската телевизија пред неколку дена, Гузенбауер објави дека повеќе не работи таму.

Набргу по завршувањето на неговата политичка кариера, поранешниот министер за финансии Народната партија, Ханс Јерг Шелинг, неколку месеци беше ангажиран како советник во гасниот концерн „Гаспром“ за проектот „Северен тек 2“, во кој е вклучен и австрискиот нафтен концерн ОМВ. „Оттогаш немам никакви обврски во Русија во каква било форма“, изјави Шелинг за виенски „Стандард“ пред неколку дена.

Австриската Партија на слободата (ФПО) имаше блиски врски со Москва некое време. Во 2016 година, партијата, предводена во тоа време од Хајнц-Кристијан Штрахе, во Москва потпиша договор за соработка со партијата на Путин Обединета Русија. Договорот истече на крајот на минатата година и не беше продолжен. Во интервју за телевизија, лидерот на партијата Херберт Кикл рече дека тоа е „мртва хартија“.

Во текстот се се посочува дека добри контакти со рускиот претседател имаат и други австриски политичари и економски експерти. Само неколку месеци откако Русија го анектираше украинскиот полуостров Крим, Путин беше примен во официјална посета на Австрија и дури беше расположен за шега за време на состаноците. Кога претседателот на Австриската стопанска комора, Кристоф Лајтл, моментално претседател на Европската стопанска комора во Брисел, му посака добредојде и забележа дека го прима по трет пат, Путин на германски рече: „Диктатура. Но, добра диктатура!“ Како одговор, салата се насмеа, како и поранешниот австриски претседател Хајнц Фишер, кој седеше до Путин, првиот шеф на државата што Путин официјално го посети по анексијата на Крим.

Веројатно причината за доброто расположение на Путин беше ставот на Австрија за санкциите: кога ЕУ ги воведе во 2014 година по руската анексија на украинскиот полуостров, некои австриски политичари постојано бараа нивно укинување.

И на 14 февруари 2022 година, непосредно пред руската агресија во Украина, Лајтл повторно се изјасни против санкциите за Русија. Тој во телевизиско интервју рече дека воопшто не е убеден во ефективноста на санкциите, бидејќи тие никогаш немаа никаков ефект. Денес, Лајтл е и копретседавач на Дијалогот во Сочи, австриско-руски граѓански форум за зајакнување на билатералните врски. Заедничката декларација на дијалогот во Сочи беше потпишана во 2019 година од тогашната министерка за надворешни работи Карин Кнајсл и рускиот министер за надворешни работи Сергеј Лавров.

Четири години откако беше примен во Австриската стопанска комора, поранешниот австриски претседател Хајнц Фишер ја бранеше и поканата за свадба на Карин Кнајсл до рускиот претседател Путин. „Нема да ја обвинувам министерката за надворешни работи доколку се залага за добри односи со Русија“, изјави Фишер во интервју за весникот „Пресе“. Видеото и фотографиите од танцот на Путин и Кнајсл на свадбата, која заврши со поклонување на австрискиот министер пред рускиот претседател, го обиколија светот и политичките набљудувачи ги коментираа како доказ за блискоста на коалициската влада на ОВП/ФПО со Русија.

Денес Кнајсл е во надзорниот одбор на рускиот концерн „Роснефт“ и често ги посетува студијата на руската државна телевизија. Таа досега не сакаше да одговара на прашањата на австриските медиуми.

Друг поранешен австриски федерален канцелар кој имаше функција во Русија, Кристијан Керн, на 24 февруари го врати својот мандат како член на надзорниот одбор на државните железници на Русија.

Сопственикот на погоните на „Штаер“ и инвеститор, Зигфрид Волф, поднесе оставка како претседател на надзорниот одбор на Сбербанк Европа АД, подружница на Сбербанк со седиште во Виена.

Русија е главен инвеститор во Австрија, се заклучува во материјалот. Во Русија има 650 австриски компании со инвестиции од 4,6 милијарди евра. Во Австрија се активни околу 500 руски компании кои инвестираат вкупно 21,4 милијарди евра.

Русија е на второто место по Германија како инвеститор во Австрија. Австриските компании инвестираат главно во индустријата за преработка на дрво и хартија, банкарството, градежништвото и прехранбената индустрија, како и во енергетиката, пакувањето и автомобилската индустрија.