Илон Маск негира дека е во „романтична врска“ со Џорџа Мелони

Илон Маск во средата негираше каква било романса меѓу него и италијанската премиерка Џорџија Мелони, откако ја нарече „убава“ на церемонијата на доделување награди во Њујорк во понеделникот.

„Бев таму со мајка ми. Нема никаква романтична врска со премиерката Мелони“, напиша американскиот технолошки милијардер Маск на Икс под фотографијата на која тој и Мелони се гледаат за време на гала вечера.

Маск на италијанската премиерка и ја додели наградата Глобален граѓанин од аналитичкиот центар на Атлантскиот совет во понеделникот, за време на која ја опиша како „некој што е уште поубав внатре отколку надвор“ и „автентична, искрена и промислена“.

Италијанската лидерка одговори со пофалби за „скапоцениот гениј“ на Маск. Таа потоа одржа страстен говор во одбрана на западните вредности, на крајот од кој Маск – кој седеше до неговата мајка – стана и аплаудираше.

Американскиот претприемач и Мелони се сретнаа неколку пати во последниве години и се поврзаа поради нивната загриженост за падот на наталитетот на Западот и интересот за потенцијалот на вештачката интелигенција.

Маск, кој неколкупати патуваше во Рим и учествуваше на фестивалот на политичките партии на Мелони во декември, исто така ја пофали италијанската влада за нејзината строга имиграциска политика.

Во последниве месеци, тој јавно го поддржа поранешниот претседател Доналд Трамп на изборите во САД во ноември и поддржа други десничарски политички фигури како што се аргентинскиот либертаријанец Хавиер Милеи и бразилскиот конзервативец Жаир Болсонаро.

Во средата, Мелони тврдеше дека изборот на Маск да ја претстави при добивањето на наградата во понеделникот е направен пред неколку месеци и дека нема „никаква врска со американската изборна кампања“ и поддршката на Маск за Трамп.