Драги: Некои фармацевтски компании продавале исти вакцини два или три пати

Одредени производители на лекови кои развија вакцини против корона вирусот можеби ветија повеќе отколку што може да испорачаат, ефикасно продавајќи ги истите ограничени дози на различни купувачи, рече италијанскиот премиер Марио Драги.

Говорејќи за предлогот на ЕУ да ги прошири овластувањата на блокот за блокирање на извозот на дози на вакцини, Драги им рече на новинарите дека механизмот „треба да се користи особено кон компаниите што не ги почитуваат договорите“.

„Има впечаток дека одредени компании, а јас нема да именувам имиња, ги продаваа вакцините два, три пати“, рече Драги на прес-конференција.

Кога станува збор за испорака на вакцини, лидерите на ЕУ ја издвоија „АстраЗенека“како најлош престапник. Компанијата првично вети дека ќе испрати 80 до 100 милиони дози во првиот квартал од годината, но износот се намали на 30 милиони.

Претходно во текот на месецот, Комисијата објави дека ја активира постапката за решавање спорови вклучена во договорот за претходна набавка во однос на недостигот за испорака. И самиот Драги, по налог на Комисијата, минатиот викенд ја испрати полицијата да испита фабрика за флаширање вакцини во земјата за да открие каде се наоѓаат 29 милиони дози на вакцините „Оксфорд/АстраЗенека“.

Во меѓувреме, локалните медиуми јавуваат дека јужниот италијански регион Кампанија независно се здобил со дози на руската вакцина „Спутник В“. Јавниот радиодифузер РАИ рече дека договорот ќе стапи на сила во зависност од одобрувањето на вакцините од Европската агенција за лекови. Во моментов, регулаторот ја проценува вакцината, со неизвесно време на одлучување.