Страшна несреќа на аеродромот во Италија: Маж бил вшмукан од мотор на авион пред полетување

Меѓународниот аеродром во Милано беше затворен откако едно лице наводно загинало во несреќа на пистата за полетување.

Според весникот „Кориере дела Сера“, жртвата – која не била ниту патник ниту член на персоналот на аеродромот во Милано (Бергамо) – починала откако била „вшмукана од моторот на авионот“.

Се верува дека човекот насилно отворил една од вратите во просторот за подигање багаж, по што истрчал на пистата и се нашол на патот на авионот што се подготвувал за полетување.

Податоците од Flightradar24 покажуваат дека Ербас А319, на летот V73511 од Милано до Астурија, Шпанија, бил во движење само една минута и 55 секунди пред да се случи несреќата.

Авионите  што требало да слетаат на овој аеродром утрово – еден од најголемите во Италија – сега се пренасочени по оваа „фатална несреќа“.

Во 11:50 часот наутро, еден лет беше пренасочен кон Болоња, два беа пренасочени кон Верона, а шест летови кон аеродромот Малпенса во Милано.

Според локалните извештаи, осум летови закажани за полетување беа откажани откако операциите на аеродромот беа прекинати во 10:20 часот наутро.

Операторот на аеродромот во Бергамо, компанијата Сакбо, објави: „Имаше инцидент на пистата, а причините во моментов ги истражуваат надлежните органи“.