Северна Кореја се вклучи во војната: испраќа војници на украинскиот фронт

Официјални лица во Украина и Јужна Кореја ја обвинија Северна Кореја дека испратила, како што се проценува, илјадници војници за да ѝ помогнат на Русија во нејзината војна во Украина. Ова отвора нова фаза од војната, според анализата на Ројтерс објавена денеска.

И Москва и Пјонгјанг ги отфрлија тврдењата, а американските власти рекоа дека сè уште ги истражуваат извештаите.

Украинскиот претседател Володимир Зеленски во четвртокот ја обвини Северна Кореја дека испраќа офицери во Русија и подготвува 10.000 војници да ѝ помогнат на Москва во нејзините воени напори.

Во петокот, јужнокорејската Национална разузнавачка служба (НИС) соопшти дека Северна Кореја испратила 1.500 припадници на специјалните сили на далечниот исток на Русија на обука и аклиматизација во тамошните воени бази.

Според јужнокорејските разузнавачи, тие ќе бидат испратени да се борат против украинските сили, најпрво во областа Курск, дел од Русија каде елитните украински бригади извршија инвазија пред повеќе од два месеци и окупираа околу 100 населени места.

Јужна Кореја објави уште една многу интересна информација. Тие тврдат дека користеле вештачка интелигенција за да препознаваат лица и да ги идентификуваат членовите на делегацијата од десетици севернокорејски офицери кои ја посетуваат линијата на фронтот во Украина.

Тие, тврдат Јужнокорејците, им дале на Русите инструкции за балистичките ракети КН-23 произведени во Северна Кореја, со кои руските сили ги гаѓаат врз воени и цивилни цели во Украина.

Во делегацијата беше вклучена и клучна фигура во ракетниот развој на Северна Кореја, идентификувана од аналитичарите во Сеул како Ри Сонг-џин, кој исто така беше виден на фотографиите минатата година како го придружува лидерот Ким Џонг-ун во фабриките кои произведуваат ракети за севернокорејската војска.

Бродови на руската Пацифичка флота беа откриени како ги премстуваат севернокорејските специјални сили во Владивосток од 8 до 13 октомври и се очекува наскоро да продолжат со слични акции, објави НИС.

На војниците им се снабдуваат руски воени униформи, оружје и лажни документи за идентификација пред да бидат распоредени во борба, соопштија јужнокорејските разузнавачи.

Рускиот претседател Владимир Путин рече дека договорот што го потпишал со Ким Џонг-ун за време на посетата на Пјонгјанг во јуни вклучува клаузула за заемна помош. Тој дефинира дека секој потписник ќе му помогне на другиот во одбивањето на надворешната агресија.

Запрашан дали тоа значи дека Русија може да биде вовлечена во поддршката на Пјонгјанг во конфликтот на Корејскиот полуостров или дека Северна Кореја би можела да застане на страната на Русија во конфликтот со Западот, портпаролот на Путин, Дмитриј Песков, рече дека пактот „имплицира вистинска стратешка длабока соработка во сите области, вклучително и безбедноста“.

Аналитичарите велат дека Северна Кореја би можела да има корист од обезбедувањето оружје и работна сила со стекнување на искуство и знаење од прва рака што произлегува од директното учество на бојното поле.

Според странските разузнавачки агенции и комерцијалните сателитски снимки прегледани од аналитичарите, Пјонгјанг, кој е под строги санкции поради својата програма за нуклеарно оружје, се чини дека во голема мера увезува нафта и други производи од Русија.

Во извештајот на тинк-тенк поврзан со јужнокорејскиот НИС се проценува дека Северот со ограничени пари заработил околу 540 милиони долари од продажбата на оружје на Русија минатата година.

Јужна Кореја денеска соопшти дека испратила протест до рускиот амбасадор поради распоредувањето на севернокорејските војници во Русија. Портпаролот на Путин ги отфрли извештаите за севернокорејските сили во Украина како „лажни вести“.

Завчера американскиот секретар за одбрана Лојд Остин изјави дека не може да ги потврди информациите дека Северна Кореја испратила војници во Русија пред можна војна против Украинците, но додаде дека таквиот потег би бил загрижувачки доколку е вистина.

Шефот на НАТО, Марк Руте, исто така минатата недела рече дека нема докази за присуство на севернокорејски сили во оваа фаза. Ако извештаите се вистинити, тоа „го покажува нивото на очај“ во Русија, изјави во петокот британскиот премиер Кир Стармер.

Русија истрела десетици балистички ракети од Северна Кореја кон Украина и прими голем број артилериски гранати и противтенковски ракети, велат Јужна Кореја, Украина, САД и независни истражувачи.

Воените аналитичари велат дека има прашања за тоа како Русија би ги ангажирала севернокорејските трупи на теренот и дека, како и оружјето, приливот на тие сили веројатно нема да ја промени ситуацијата, но би можел да помогне да се продолжи конфликтот.