Русија соопшти дека Мариупол е исчистен од украинските сили

Руското Министерство за одбрана во саботата објави дека ја исчистило целата урбана област на Мариупол од украинските сили и рече дека само неколку борци останале во челичарницата „Азовстал“.

Во објавата на интернет, Министерството соопшти дека од 16 април, украинските сили во опколениот пристанишен град изгубиле повеќе од 4.000 луѓе, додаде РИА.

Руските сили веќе неколку недели се обидуваат да го заземат пристаништето, кое се наоѓа на Азовското Море.

„Целото урбано подрачје на Мариупол е целосно исчистено… остатоците од украинската група во моментов се целосно блокирани на територијата на металуршкиот комбинат ‘Азовстал’“, соопшти Министерството.

„Нивната единствена шанса да ги спасат своите животи е доброволно да го положат оружјето и да се предадат“, се додава во соопштението.

Немаше итна реакција од Киев на изјавата на руското министерство, кое исто така соопшти дека досега се предале 1.464 украински војници.

Москва соопшти дека вкупниот број на, како што рече, „неповратните загуби“ што ги претрпе Украина изнесува вкупно 23.367 луѓе, но не обезбеди никакви докази и не кажа дали тоа ги вклучува само оние кои загинале или кои исто така биле повредени. (Ројтерс)