Најџел Фараж со план како Трамп, сака да депортира 600.000 мигранти

Лидерот на Реформистичката партија во Обединетото Кралство, Најџел Фараж, откри низа мерки за ограничување на миграцијата што ќе ги спроведе ако дојде на власта,  од напуштање на Европскиот суд за човекови права, па до депортирање на 600.000 мигранти во првиот мандат.

„Околу 600.000 баратели на азил би можеле да бидат депортирани во првиот парламент на партијата Реформирај го Обединетото Кралство“, посочи Најџел Фараж, проценувајќи дека сегашната влада на лабуристите нема да го потроши целиот мандат и ќе падне.

Најџел Фараж рече дека е загрижен за мигрантите кои потенцијално се соочуваат со тортура по депортацијата, но дека е повеќе загрижен за тоа што се случува на улиците на Велика Британија.

„Она што навистина ме вознемирува е она што им се случува на британските граѓани. Она што навистина ме вознемирува е растечката загриженост со оправдани докази дека жените и девојките се многу помалку безбедни на улиците отколку што беа пред да започне ова.Значи, сè се сведува на тоа на чија страна сте?“- рече Фараж.

Тој на прес-конференцијата во Оксфордшир изјави дека ако дојде на власт  ќе „ги прошири чартер летовите на пет заминувања секој ден“.

 „За да се гарантира успех, Кралските воздухопловни сили  ќе чуваат авион „Војаџер“ во готовност како резерва. Значи, дури и ако авионот има механички проблеми, летовите нема да бидат запрени. Депортациите нема да бидат одложени“, рече Фараж.

Според него, партијата ќе изгради капацитет за притворање до 24.000 нелегални мигранти истовремено, дозволувајќи  да депортира до 280.000 годишно. Тој рече: „Притворањето ќе значи депортација, нема шанси за кауција, нема шанси за бегство.“ 

Според планот, Министерството за внатрешни работи, имиграциските трибунали и повисоките судови ќе бидат лишени од овластувања „дури и да разгледуваат барања за азил“ ако некое лице дојде нелегално во Велика Британија. Пораката е дека „нема да има адвокат ниту судија во земјата што ќе може да спречи заминување на лет за депортација“. Повторното влегување по депортацијата или уништувањето на документи за идентификација ќе стане кривично дело казниво со затвор до пет години.

Вистинскиот број на нелегални имигранти во Велика Британија е „значително поголем“ од еден милион, тврди висок функционер на партијата Реформирај го Обединетото Кралство. Зија Јусуф, поранешниот претседател на партијата, на прес-конференција изјави дека „година по година, десетици илјади мажи во воена возраст, како што рече, пристигнале на британските плажи. Вкупниот број на нелегални имигранти во земјата сега изнесува најмалку еден милион. Вистинскиот број би можел да биде значително поголем од тоа“, рече тој. Според негова оценка,  повеќе луѓе пристигнале нелегално на британските плажи во последните осум години отколку што ги нападнале плажите на Нормандија на Денот Д и  „тие се наградени за ова од политичка класа која ги сместува во хотели на сметка на британските даночни обврзници, им дава бесплатни оброци, бесплатна здравствена заштита, бесплатни телевизиски лиценци,дури и бесплатни патувања до сафари паркот и до киното“. Според него, трпението на британскиот народ сега е исцрпено.

Најџел Фараж вети дека ако формира влада  ќе го напушти Европскиот суд за човекови права и ќе ги запре чамците што го преминуваат каналот „за неколку дена“.Поставувајќи го својот план за депортација, Фараж рече: „Мора да го напуштиме Европскиот суд за човекови права, без ако, без но.Можеби беше добра идеја пред 80 години. Искрено, не е денес.“

Тој рече дека партијата ќе го укине и Законот за човекови права од 1998 година, ќе ја укине Конвенцијата за бегалци од 1951 година за пет години и ќе ги отстрани „сите други пречки што адвокатите во оваа земја можат да ги користат за да спречат депортации, да спречат да се случи вистинската работа“.

Тој потоа додаде: „Ќе создадеме законска обврска за министерот за внатрешни работи да ги отстрани оние што доаѓаат нелегално и, што е клучно, ќе ги притвориме сите нелегални мигранти што доаѓаат и ќе го сториме тоа веднаш.Единствениот начин да ги запреме бродовите е со притворање и депортирање на апсолутно секој што доаѓа преку таа рута.“ Според негова оценка, приливот на мигранти во Британија е „инвазија“ за која предупредувал со години.

„Тоа е инвазија, бидејќи овие млади мажи нелегално влегуваат во нашата земја.“

Фараж ги обвини Велика Британија и Франција за „соработка во нивната поддршка на криминални активности“ со операциите во Ла Манш и рече: „Ова прашање стана мака на модерна Британија. Само помислете на хотелите, помислете на куќите со повеќекратно домување, и не само на нивната цена, туку помислете колку е тоа неправедно, неправедно кон 1,3 милиони Британци кои моментално се наоѓаат на листата за социјални станови, неправедно кон оние кои легално влегле во Обединетото Кралство. Неправедно е и цената, искрено, е заводлива.“

Фараж на својата прес-конференција изјави дека има „огромен број недокументирани мажи кои ги фрлаат своите пасоши и iPhone-и во Ламанш“. Затоа, според него, растечкиот гнев во земјата во текот на последните неколку недели е културен, во смисла дека многу од овие млади мажи доаѓаат од земји во кои жените не се ниту граѓани од втор ред“.

„Она што започна како протест на мајки и загрижени граѓани пред хотелот Бел во Епинг сега се прошири низ целата земја, и сето тоа навистина поставува едно големо фундаментално прашање, на чија страна сте? Дали сте на страната жените и децата да бидат безбедни на нашите улици? Или сте на страната на застарените меѓународни договори?“

Тој исто така најави дека како партија што би формирала влада, ќе ги „санкционираат земјите што одбиваат да ги примат назад мигрантите“.

Зија Јусуф, поранешниот претседател на партијата, рече дека визите ќе бидат суспендирани за граѓаните на земјите според планот за справување со нелегалната миграција.Тој рече дека партијата ќе се обиде да склучи договори за враќање во рамките на „семоќна кампања за надворешната политика“. Но, додаде тој, „ако договорите не можат да се постигнат со стимулација, со морков, тогаш апсолутно ќе употребиме влијание. Ќе престанеме да издаваме визи и доколку е потребно, ќе воведеме санкции“.

Партијата на Фараж исто така нема да ги открие планираните места за притвор на мигранти.
„Мигрантите би можеле да бидат преселени на оддалечениот остров Асенсион според плановите за депортација“, вели Зија Јусуф. 

Практично, поранешниот претседател на партијата рече дека според шемата на Најџел Фараж, мигрантите кои не можат да бидат вратени во нивната матична земја или во трета земја ќе бидат однесени на Британската прекуокеанска територија во Јужниот Атлантик.На прашањето дали тоа е реалистичен предлог со оглед на тешкотијата во пристапот до островот, Јусуф изјави за Добро утро Британијо: „Постојано има многу летови за слетување таму. Има околу 800 до 1.000 жители на која било точка. И патем, всушност се користеше како точка за слетување на итни вселенски шатли.“

На прашањето што ќе се случи со оние испратени на островот, Јусуф рече: „Повторно ќе имаме центри за притвор и доколку е потребно, ќе ги преселиме таму.“ (Тајмс)