Ѓоковиќ останува без важен спонзор – се повлекува „Пежо“

Производителот на автомобили „Пежо“ повеќе нема да биде спонзор на српскиот тенисер Новак Ѓоковиќ. Процесот за раскинување на спонзорскиот договор сѐ уште не е завршен, но ќе биде наскоро.

Први оваа вест ја пренесоа англиските медиуми, а потоа информацијата за „Ел Еспањол“ ја потврди и генералниот директор Карло Таварес.

„Тоа е вистина. Нема да ја продолжиме соработката со Ѓоковиќ“, изјави Тавареш.

„Пежо“ е еден од главните спонзори на Новак од 2014 година. Не се наведува зошто е раскинат договорот.

Странските медиуми јавуваат дека на потегот на „Пежо“ влијаела одлуката на српскиот играч да не ја прими вакцината против корона вирусот.

Исто така, една од потенцијалните причини е влијанието на пандемијата на корона вирусот врз автомобилската индустрија и финансиската загуба што ја имаше „Пежо“.