ЕП го одобри буџетот на Европската Унија за 2021 година

Европскиот парламент денеска го одобри буџетот на Европската унија за следната година, во кој приходната страна изнесува 164,3 милијарди евра, додека расходниот дел е 166,1 милијарди евра, се наведува во информациите објавени на веб-страницата на ЕП.

Откако Советот на ЕУ во понедленикот официјално го одобри договорот меѓу членките, европратениците денеска го одобрија буџетот со 540 гласа „за“, 77 „против“ и 70 воздржани, по што законот за негово усвојување го потпиша претседателот на ЕП, Давид Сасоли.

Европратениците дополнително ги поддржаа програмите што се сметаат за клучни за зајакнување на растот и вработеноста и ги рефлектираат широко договорените приоритети на Европската унија: Дигитална Европа и Механизмот за поврзување на Европа (ЦЕФ), зајакнување на почитувањето на европските вредности и стимулирање на активностите во областа на климата.