Блинкен и Остин утре одат во Киев

Украинскиот претседател Володимир Зеленски на прес-конференција изјави дека американскиот државен секретар Антони Блинкен и шефот на одбраната Лојд Остин ќе го посетат Киев на 24 април.

„Утре американските официјални лица доаѓаат да нѐ посетат; ќе се сретнам со секретарот за одбрана [Остин] и Антони Блинкен“, им рече тој на новинарите на 23 април.

Доколку се случи, посетата ќе го одбележи пристигнувањето од највисок профил на американски официјални претставници по серијата посети на европските лидери на главниот град на Украина, опустошен од војната.

По другите посети, администрацијата на Бајден беше под притисок да испрати претставник на високо ниво во Украина како знак на поддршка поради руската брутална инвазија на земјата.

Зеленски на прес-конференцијата рече дека ќе разговара со американските официјални лица за видовите на оружје потребни на Украина во нејзината борба против неиспровоцираниот напад на Русија.

Немаше моментален коментар од американска страна, која рече дека размислува за посета, но дека самиот Бајден нема да патува во Украина.

Зеленски, исто така, упати нов повик за средба со рускиот претседател Владимир Путин во обид „да се стави крај на војната“.

„Мислам дека кој и да ја започна оваа војна ќе може да ја заврши“, рече тој на телевизиската прес-конференција, одржана на метро станица во централна Украина.

„Од почетокот инсистирав на разговори со рускиот претседател“, рече тој.

„Не е дека сакам [да се сретнам со него]; туку дека морам да се сретнам со него за да го решам овој конфликт со дипломатски средства. Имаме доверба во нашите партнери, но немаме доверба во Русија“, додаде тој.

Украинскиот лидер го повтори предупредувањето дека Киев ќе ги прекине преговорите доколку Русија ги убие преостанатите украински војници кои се борат во фабриката за челик во опколеното пристаниште Мариупол. (Според агенциите)