15-годишната Русинка со интересно објаснување за допинг – скандалот: Беше грешка

Петнаесетгодишната руска лизгачка Камила Валиева, вмешана во допинг скандал на Зимските олимписки игри, се бранеше на сослушување, тврдејќи дека по грешка земала лекови за срцето на нејзиниот дедо, изјави во вторникот претставник на МОК.

Валиева го изнесе аргументот на сослушувањето пред Судот за спортска арбитража (CAS) за тоа дали треба да ѝ се дозволи да продолжи да се натпреварува во Пекинг, рече Денис Освалд, постојан претседател на Дисциплинската комисија на Меѓународниот олимписки комитет.

„Нејзиниот аргумент беше дека оваа контаминација се случила со мешање со производ што го земал нејзиниот дедо“, рече Освалд.

Претходно, МОК на прес-конференција соопшти дека примерокот „Б“ на Валиева допрва треба да се анализира и покрај првичниот позитивен резултат.
Тинејџерката доби одобрение од CAS да се натпреварува во поединечна конкуренција во вторник, откако CAS се согласи со одлуката на Руската антидопинг агенција (RUSADA) да ја укине забраната.

Валиева беше тестирана на нејзиниот државен шампионат на 25 декември, но позитивен тест за забранет лек за ангина беше откриен дури на 8 февруари, откако таа веќе се натпреваруваше на Игрите во Пекинг.

„Овие изминати денови ми беа многу тешки. Како да немам повеќе емоции. Среќна сум што лизгам, но во исто време сум емотивно уморна“, изјави Валиева за руската телевизија.

Доколку Валиева заврши меѓу првите три натпреварувачки во женска поединечна конкуренција, церемонијата на медали нема да се одржи за време на овие Игри. ММО објасни дека „заради правичност меѓу спортистите“ ќе почека да се утврди дали имало или не прекршување на анти-допинг правилата кај Валиева, што обично трае неколку месеци.