Дејвид Блат е нов тренер на Олимпијакос

Грчкиот гигант Олимпијакос (Пиреја) официјално доби нов тренер.

Се работи за Дејвид Блат и тој доаѓа кај „црвено-белите“ по успешен престој во турскиот клуб Дарушафака (Истанбул), каде го освои вториот по важност турнир во Европа – Еврокупот.

Педесет и девет годишниот Американец со израелски пасош има титула и од Евролигата со Макаби (Тел Авив), како и финале во НБА на чело на Кливленд Кавалирс.

Стратегот, кој е роден во Бостон, потпиша договор за две сезони. Тој има искуство во грчкиот шампионат, бидејќи во 2010 година беше на чело на друг од локалните тимови – Арис (Солун).

Олимпијакос го предаде врвот во локалното првенство на големиот ривал Панатинаикос во минатата сезона.