Зошто една од првите одлуки на Трамп беше да промени име на планина

Претседателот Доналд Трамп потпиша извршна наредба за преименување на Денали, највисокиот планински врв во Северна Америка, во Мекинли, името што го носеше врвот на Алјаска до 2015 година. Вилијам Мекинли беше американски претседател кој, како и Трамп, веруваше дека царините се начин да се одржи американската економија.

Доналд Трамп ја потпиша наредбата само неколку часа по враќањето на претседателската функција, пишува „Форбс“.

„Ќе го вратиме името на големиот претседател Вилијам Мекинли на планината Мекинли, каде што треба да биде и каде што му е местото“, рече тој во својот говор.

Иако планината го доби името по поранешниот претседател во 1917 година, дебатата за името траеше долго, поради народот Атабаскан Којукон, северноамерикански домородци од Алјаска, кои областа во близина на планината и самиот врв ја нарекле Денали.

Во 1896 година, истражувачот Вилијам Дики прв ја нарекол планината Мекинли, по тогашниот претседателски кандидат Мекинли.

Во 1916 година – пред областа да биде категоризирана како национален парк – Чарлс Шелдон побарал од инженерската комисија на Алјаска да ја именува „Национален парк на планината Денали“, за да се зачува вистинското индијанско име за планината Денали (што значи „голема“), според Службата за национални паркови.

Меѓутоа, во 1917 година, паркот го добил името „Национален парк на планината Мекинли“, и покрај фактот што не е во духот на народот Атабаскан да ги именува планините по луѓе.

Потоа, во 1975 година, државата Алјаска поднела петиција да се смени името официјално во Денали, а во 1980 година – и покрај неуспехот на официјалните напори – Законот за заштита на земјиштето од национален интерес на Алјаска го смени името на паркот во Национален парк и резерват Денали.

Конечно, во 2015 година, тогашниот претседател Барак Обама, во кампања за подобрување на односите меѓу федералната влада и домородните племиња, го легализираше името Денали.

Вилијам Мекинли, инаку, никогаш не ја посетил планината и немал значајни историски врски со областа.

Денали не е единствената промена на името за која размислува Трамп. Истата извршна наредба, исто така, го преименува Мексиканскиот Залив во Заливот на Америка, нешто за што тој редовно зборуваше во последните недели.

На почетокот на јануари, Трамп рече дека бара промена на името, како одмазда за имиграцијата од Мексико, која тој ја нарече „многу опасно место“.