Зошто детето оди на прсти: Нормално е до оваа возраст, но подоцна укажува на проблем

Одењето со прсти е вообичаено кај децата, а еве кога се смета за нормално и кога е симптом кој укажува на проблем.

Првите чекори на детето се особено радосен момент за мајките и татковците. Родителите со нетрпение го очекуваат своето дете да прооди, особено што пешачењето е еден од параметрите на здрав и нормален развој.

Меѓутоа, понекогаш се случува детето да оди како балерина, на прсти, а на родителите им е симпатично, но потоа и го загрижува. Дали е ова нормално или треба да реагираат, да одат на специјалист?

Движењето на прсти може да биде привремено
Постојат неколку причини зошто детето оди на прсти, но најчесто тоа е природен процес, или само фаза во која малото дете учи како правилно да оди. Малите деца можат вака да одат до крајот на втората година од животот.

Освен тоа, ако тоа го прават спорадично, а потоа нежно ја ставаат ногата на подот и одат нормално, тогаш тоа обично не е причина за загриженост. Но, доколку овој тип на одење е доминантен, а детето не научи да оди правилно, газејќи од петицата до целото стапало, тогаш треба да се консултирате со педијатар.

Што може да укаже одењето на прсти?
Како што рековме, одењето со прсти често е дел од развојот на децата и во одреден момент престанува. Сепак, овој тип на одење може да биде и симптом на некои повеќе или помалку сериозни нарушувања.

Ако детето предолго или постојано оди на прсти, треба да се има на ум дека тоа може да укажува на некои развојни аномалии, аутизам или болести на мускулите и коските. Исто така, важно е да се знае дека одењето со прсти обично не е единствениот симптом на нарушување или проблем, туку е придружено и од други.

Одењето на прсти може да биде последица на проблеми со Ахиловата тетива, ненормална структура на коските, мускулна слабост… Исто така, преосетливоста може да биде причина поради која детето оди на прсти, а тоа е најчесто случај со аутизмот, а овој симптом е најчесто придружени со проблеми со говорот, изолација, проблеми со социјализација, пишува dziecko.medonet.pl.

Што да направите ако вашето дете оди на прсти
Во повеќето случаи, одењето на прсти се смета за нормално во првите две години од животот, а детето потоа учи да оди правилно. И што можат да направат родителите во меѓувреме?

Тие можат да му пружат поддршка на малечкото од самиот почеток, без да го принудат да прооди што побрзо и без да го забрзаат овој природен процес. Не е препорачливо да користите никакви помагала како што се патерици и ремени при одење. Добро е ако вашето малечко има можност да оди босо, па затоа е добро да му ги соблечете чевлите и чорапите кога можете и да му дозволите да оди босо на различни површини.

Ако одењето на прсти продолжи и по втората година од животот, најдобро е да се консултирате со специјалист. Понекогаш е потребно да се направат некои невролошки тестови за да се исклучат одредени нарушувања и здравствени состојби, а понекогаш е неопходно детето да носи ортопедски чевли.

Имајте на ум дека самото одење со прсти обично не е симптом на сериозно пореметување, затоа внимавајте дали е придружено со некои други симптоми – психомоторни нарушувања, преосетливост на одредени стимуланси итн. Колку порано е интервенцијата, без оглед на видот на проблемот, толку се поголеми шансите за напредок.