Заев: Останувам да помогнам да се стабилизира мнозинството

Премиерот и лидер на СДСМ Зоран Заев доцна синоќа изјави дека на синоќашните седници на Извршниот и Централниот одбор на партијата не се дискутирало ниту се одлучувало за неговите оставки на челните позиции во партијата и Владата, додавајќи дека останува „да помогне за да се стабилизира парламентарното мнозинство и по можност да се зголеми“.

– Слободата е убава работа. Денеска имаме одлука на Централниот одбор за одложување на оставките. Ниту моите оставки се дискутираат, ниту се одлучува по нив. Кога ги најавив на 31-ви вечерта, потврдив дека останувам да се задржи мнозинството и ако може да се зголеми. Очекувам демократското мнозинство да се стабилизира, особено она мнозинство кое е за ЕУ, за мултиетничко општество. Деновите се пред нас, секако тоа ќе го дознаеме сите, рече Заев по седниците на највисоките органи на СДСМ.

Извршниот и Централниот одбор на СДСМ синоќа едногласно донесоа одлука премиерот и лидер на партијата Зоран Заев да ги одложи оставките се додека не се нормализираат процесите во државата. Заев оставките ги најави вечерта по одржувањето на локалните избори. 

Според „Фокус“, Заев на Централниот одбор соопштил дека многу влијателни меѓународни водачи го контактирале за да го уверат да не се повлекува, вклучително и долгогодишната германска канцеларка Ангела Меркел и францускиот претседател Емануел Макрон.Тие го уверувале  дека постојат големи шанси земјата во декември конечно да почне преговори со ЕУ. Без оглед на епилогот, Заев планирал повлекување од премиерската функција на крајот на оваа или на почетокот на следната година, додека, истакнуваат од СДСМ, на следниот Централен одбор треба да се распише постапка за избор на нов претседател.