Второ советување за правните основи за запишување и промени во Катастарот
Денеска во Скопје се одржа второто советување на тема: „Правни основи за запишување, прибележување и промени во катастарот на недвижности“, организирано од Агенцијата за катастар на недвижности, во соработка со Правниот факултет „Јустинијан Први“ и Академијата за судии и јавни обвинители.
Во своето воведно обраќање, директорот на Агенцијата, Иван Живковски, истакна дека овој тип советувања претставува нова пракса која институцијата ја воведува со цел унапредување на професионалните знаења и ускладување на административната пракса со законската регулатива.
„Ветивме дека воведуваме нова практика – ете одиме по тој пат и се надевам дека ова навистина ќе стане традиција“, нагласи Живковски.
Тој подвлече дека ваквите настани имаат суштинска улога во надминување на секојдневните професионални предизвици:
„Животот е секојдневно учење. Професионалниот ангажман бара усогласување во работата, разрешување на дилеми и совладување на пречки. Континуираното образование значи проширување на знаењата и вештините – сето тоа во интерес на граѓаните и заедничкото добро. Учењето никогаш не треба да запре, професионалноста мора да се унапредува“, порача директорот.
На советувањето беа опфатени три значајни теми:
- „Правни основи за запишување на прибележување и промени во катастарот согласно Законот за трговски друштва“ – судија Биљана Јачева
- „Правни основи за запишување согласно Законот за стечај“ – судија Татјана Сусулеска
- „Поим, карактеристики и правен режим на влоговите во капиталски друштва, со посебен осврт на непарични влогови“ – проф. д-р Горан Коевски.
„Темите и предавачите беа најавени, но сметав дека е важно дополнително да ги потенцирам, затоа што станува збор за исклучително важни области и стручни лица од судската и академската практика“, рече Живковски и изрази увереност дека ова советување ќе предизвика подеднаква професионална љубопитност како и првото, и ќе придонесе кон унапредување на секојдневната практика – сѐ во интерес на корисниците и пошироката јавност.