Високо станува регионален тениски центар – Ѓоковиќ тука ги полни батериите

Босна– Неодамна крунисаниот шампион на Вимблдон Новак Ѓоковиќ во средата пристигна во Босна за да ги отвори тениските терени во „пирамидалниот парк“ што редовно го посетува за да ги наполни батериите.

Тениската ѕвезда, позната по своите духовни интереси за новото време, го сака ридскиот град Високо, каде што илјадници луѓе секоја година се собираат во, како што некои веруваат, древен комплекс на пирамида создаден од човекот со исцелителна моќ – тврдење кое научниците го отфрлија.

35-годишниот Србин, кој ја освои својата 21. Гренд слем титула во неделата, го посети местото за прв пат во 2020 година и го нарече „рај на земјата“.

Најмалку четири пати се враќаше во комплексот „Босански пирамиди на сонцето“, сам или со семејството, за секогаш да биде срдечно пречекан од неговиот основач Семир Османагиќ.

Босанскиот бизнисмен и љубител на античката цивилизација Османагиќ рече дека идејата за изградба на регионален тениски центар за обука се родила за време на последната посета на Ѓоковиќ во март.

„Се договоривме да изградиме во нашиот парк два терени за тренирање на играчи од највисоко ниво, еден тврд и друг со земјена подлога“, изјави неодамна Османагиќ за новинарите.

Идејата е на играчите и на пријателите на Ѓоковиќ да им се понуди шанса да тренираат и да имаат бесплатно сместување, објасни тој.

„Ние исто така сакаме да организираме овде Пирамидален куп за играчи од регионот и сакаме особено да ги мотивираме младите да играат тенис и други спортови“.

Инаугурацијата ќе биде одбележана со целодневни настани со неколку егзибициони натпревари, особено на Ѓоковиќ и Хрватот Иван Додиг, светскиот рекет број 17.

По пристигнувањето, Ѓоковиќ ги посетил новите терени и заедно со својот домаќин, според новинарот на АФП, се прошетал во борова шума, која е дел од паркот.

Османагиќ, самонаречен археолог, во последните две децении тврди дека открил неколку пирамиди изградени од мистериозна цивилизација блиска до Високо.

Во изминатите неколку години неговите тимови ги расчистуваа и подземните тунели во близина на „Пирамидите на сонцето“ и тој се пофали со неговите корисни ефекти врз здравјето на посетителите.

Ѓоковиќ медитирал на местото и за време на секоја посета пешачел километри по „енергетски“ тунели, кои според археолозите се древен рудник за злато.

Во 2020 година, Ѓоковиќ изјави за АФП дека се чувствува „регенериран“ по посетата.

„Знам дека има многу сомнежи и дилеми за автентичноста“ на местото, рече тој.

Но, „за целосно да разберете што се случува овде… мора да дојдете“.

Ѓоковиќ во понеделникот рече дека е малку веројатно дека ќе настапи на овогодинешниот УС Опен бидејќи и понатаму одбива да се вакцинира против коронавирус. (АФП)