„Ватсап“ ќе ви овозможи автоматски да споделувате статуси како „стори“ на Фејсбук и Инстаграм

Апликацијата WhatsApp ќе биде додадена во Metа Accounts Center во следните неколку месеци, а откако тоа ќе се направи, корисниците ќе имаат можност автоматски да споделуваат статуси на WhatsApp како приказни на Facebook и Instagram.

Додавањето профил на WhatsApp во Metа Accounts Center ќе биде опционално, што значи дека функцијата ќе биде стандардно исклучена. Оние кои ќе ја активираат ќе можат да контролираат како и каде сакаат да објавуваат статуси на WhatsApp, на Facebook, Instagram или на двете социјални мрежи.

Центарот за сметки ви овозможува да се најавите на повеќе Мета апликации користејќи иста сметка. Во иднина, Мета планира да додаде можност за управување со аватари, Meta AI налепници и креации за Imagine Me на едно место преку Центарот за сметки за сите апликации на компанијата.

Мета истакнува дека додавањето на WhatsApp во Центарот за сметки не го менува фактот дека корисничките пораки и повици сепак ќе бидат заштитени со шифрирање од крај до крај, што значи дека „никој, дури ни WhatsApp или Meta, не може да ги чита или слуша. “