Украина прогласи победа во клучната битка за Покровск

Обидот на Русија да го освои источноукраинскиот град Покровск е е „неуспех“, вели Украинскиот центар за безбедност и соработка, по месеци жестоки борби и бавно напредување на Русија околу градот.

Русија долго време се обидува да го освои Покровск, но наместо директно да го нападнат градот, руските сили маневрираат јужно од него и напредуваат кон границата со Дњепропетровската област.

Покровск е важен логистички центар и со месеци е едно од главните жаришта на борбите на фронтот. Киев го опишува како „тврдина“ во одбраната на истокот на земјата, со силни врски со други клучни градови под украинска контрола.

„Гледаме координирана руска информативна кампања која се обидува да го прикрие својот неуспех – фактот дека ја загубија битката за Покровск“, изјави за Радио НВ Серхиј Кузан од Центарот за безбедност и соработка на Украина.

Иако руските сили направија делумен напредок околу градот, Покровск останува под украинска контрола.

Според Киев, руските загуби во борбите за Покровск далеку ги надминуваат украинските загуби. Оваа информација не е независно потврдена, но руската војска е позната по својата таканаречена тактика на „мелница за месо“ – испраќање голем број војници во фронтални напади, без оглед на загубите.

Total epic detonation of a Russian T-80BVM’s ammo after a Ukrainian FPV drone strike on the Pokrovsk front! pic.twitter.com/bTo3qDZ9lE

— WarTranslated (@wartranslated) February 22, 2025

Кузан вели дека Украина „ја спровела“ својата одбранбена стратегија, нарушувајќи ги временските рамки на Русија и „оневозможувајќи ги нивните пошироки планови за летна офанзива“. „Нивните планови пропаднаа, сега заостануваат зад сопствениот распоред, а тој е клучен за нивниот летен напад“, рече Кузан.

„Тие не можат да нè избркаат од регионот Донецк затоа што ги запревме во близина на Покровск“, додаде тој.

Киев предупредува дека Русија собира резервни сили за уште една голема офанзива, а високи украински претставници велат дека Москва ги интензивирала операциите во две области во североисточна Украина претходно овој месец.

Украина започна упад во рускиот Курски регион минатиот август за да го одвлече вниманието на руската војска од градови како Покровск.

Руските сили неодамна напредуваа по железничката линија западно од селото Шевченко, јужно од Покровск, според американскиот Институт за проучување на војната (ISW), кој секојдневно ја следи ситуацијата на бојното поле.

Украинската војска денес објави дека во текот на претходните 24 часа спречила 75 руски напади во областа.

Во изјава подоцна истиот ден, украинскиот генерал Олександр Сирски рече дека Русија „значително го зголемила“ бројот на напади во близина на Покровско, обидувајќи се да напредува кон регионот Дњепропетровск, и покрај најавата за еднострано примирје кое треба да стапи на сила во мај.

„Руската команда секојдневно испраќа нови единици во битка, испраќа војници во смрт и доставува извештаи за илузорни успеси и победи“, рече Сирски.

Останува нејасно како рускиот неуспех кај Покровск ќе влијае на нивните планови за најавената летна офанзива. Според некои извештаи, Русија наводно планира да користи мотоциклистички војници во борба за да се спротивстави на украинските беспилотни летала.