Трамп: Тукушто почнавме. Сè уште не видовте ништо

Американскиот претседател Доналд Трамп го прослави 100-от ден од својот втор мандат со предизборен митинг во Мичиген, за време на кој му се потсмеваше на Џо Бајден во 90-минутен говор, лажно тврдеше дека ги добил изборите во 2020 година и ја бранеше одлуката за воведување царини. „Ништо нема да ме запре“, рече Трамп.

Зборувајќи пред електронски екрани со натпис „100 дена величина“, Трамп ги нападна „радикалните левичарски лудаци“, накратко се соочи со еден демонстрант во публиката и се пофали со масовните депортации на неговата администрација.

„Отстранувањето на натрапниците не е само предизборно ветување“, рече тој. „Тоа е моја свечена должност како врховен командант. Имам обврска да ја спасам нашата земја.“

На митингот, тој покажа видео за кое неговата администрација тврди дека ги прикажува мигрантите, наводни членови на банди, како пристигнуваат во озлогласен затвор во Ел Салвадор, додека толпата навиваше на сцените на кои на депортираните им се бричеа главите.

За време на говорот, во кој покани неколку од неговите најблиски соработници на бината, Трамп изјави дека неговата администрација ги донела „најдлабоките промени во Вашингтон за речиси 100 години“.

„Кина сака договор. Ќе биде фер“

Тој, исто така, се осврна на царините, велејќи дека Кина, која моментално се соочува со царини од 145%, „одзеде повеќе работни места од Соединетите Држави отколку што која било друга земја некогаш одзеде од друга“.

Но, тој додаде дека тоа не значи дека Пекинг и Вашингтон не можат да „се согласуваат“ и нагласи дека верува оти трговскиот договор со Кина е блиску:

„Мислам дека ќе успее“, рече тој. „Тие сакаат договор. Ние ќе го постигнеме. Но, тоа ќе биде фер договор.“

Трамп, исто така, тврдеше дека неговата администрација „веќе ја запрела инфлацијата“, иако Бирото за статистика на трудот на САД минатиот месец објави дека инфлацијата се забавила во март, но останала на 2,4% на годишна основа.

President Trump Breaks Out the Trump Dance to Celebrate 100 Days of Winning! 🇺🇸 pic.twitter.com/a13XxGvpZx

— The White House (@WhiteHouse) April 30, 2025

„Уште ништо не видовте“

Трамп, кој во последните недели често го критикуваше претседателот на Федералните резерви на САД, Џеј Пауел, рече:
„Каматните стапки се намалија, и покрај фактот дека имаме човек во ФЕД кој не ја врши многу добро работата, но нема да го кажам тоа. Сакам да бидам многу учтив. Многу учтив и почитувачки кон ФЕД. Не треба да ја критикувате ФЕД. Таа треба да си го прави своето. Но, верувајте ми, јас знам многу повеќе за каматните стапки отколку тој.“

Трамп, исто така, ги бранеше строгите царини што неговата администрација ги воведе на автомобили и автоделови, само неколку часа по потпишувањето на извршна наредба со која се обидува да го ублажи нивното влијание врз американските производители на автомобили.

„Вечерва сме тука, во срцето на нашата нација, за да ги прославиме најуспешните први 100 дена од која било администрација во историјата на нашата земја“, рече Трамп.

Подоцна додаде: „Тукушто почнавме. Сè уште не сте виделе ништо.“

Трамп, исто така, го пофали својот сојузник милијардер Илон Маск и неговиот „Оддел за владина ефикасност“ или ДОГЕ, и ги осуди критиките упатени кон основачот на Тесла и СпејсИкс.

„Она што му го направија не е фер. Тоа е срамота“, рече Трамп.