Струјата  постепено се враќа во Шпанија и Португалија по масовниот прекин

Снабдувањето со електрична енергија полека почна да се враќа во делови од Иберискиот Полуостров по масовното затемнување што ги парализираше Шпанија и Португалија.

Шпанскиот министер за внатрешни работи прогласи вонредна состојба и распореди 30.000 полицајци низ целата земја за да го заштитат јавниот ред.

Владите на двете земји одржаа итни седници поради прекин на електричната енергија чии размери се невидени во Европа.

Причината сè уште е непозната, а Португалија наговести дека проблемот потекнува од Шпанија, која прстот го вперува кон Франција за прекинот на меѓусебната врска.

Португалскиот премиер Луис Монтенегро изјави дека нема индикации дека инцидентот, кој започнал во 10:30 часот, е предизвикан од сајбер напад.

Сепак, се појавија гласини за саботажа, а шпанскиот премиер Педро Санчез изјави дека разговарал со генералниот секретар на НАТО, Марк Руте.

Санчез рече дека за само пет секунди, земјата изгубила 15 гигавати електрична енергија, или 60 проценти од националната потрошувачка. „Техничарите се обидуваат да утврдат што предизвикало толку ненадеен пад“, рече Санчез. „Ништо вакво никогаш не се случило.“

Жоао Консеисао, член на одборот на португалската компанија за електрична енергија РЕН, изјави дека не ја исклучува можноста за „огромна осцилација на електричниот напон, прво во шпанскиот систем, која потоа се прелеала во португалскиот систем“.

„Може да има илјада и една причина, сè уште е прерано да се каже која е причината“, рече тој.

Шпанската електроенергетска компанија REE смета дека проблемот се појавил во интерконекцијата со Франција. „Европските системи не можат да се справат со загуба на електрична енергија од ваков обем, што предизвика прекин на електричната енергија меѓу шпанската и француската мрежа и последователно предизвика колапс на шпанскиот електроенергетски систем“, рече директорот на компанијата, Едуардо Прието.

Претходно, делови од Франција накратко останаа без електрична енергија. Францускиот оператор РТЕ објави дека испратил електрична енергија во северните делови на северна Шпанија по инцидентот.

Електричната енергија беше обновена во Баскија и областа околу Барселона во раните попладневни часови, а во делови од Мадрид во вечерните часови, при што 61 процент од мрежата беше вратена во нормала, соопшти националниот оператор.