„Сити плаза“ официјално сопственик на „Рамстор Македонија”: Одлучивме да инвестираме во иднината

„Не можеме да се затвориме и да чекаме подобри времиња, нив треба сами да ги создаваме“, порача денес Ајдован Адемоски, чија компанија „Сити плаза“ од денес и официјално е сопственик на „Рамстор Македонија”, во чиј развој во наредните пет години ќе инвестира над 105 милиони евра.

„Во ера на пандемија, која го зафати целиот свет, одлучивме да инвестираме над 100 милиони евра во нашата иднина и во иднината на нашата држава, рече Адемоски презентирајќи ги плановите на свеченоста во хотелот „Хилтон“ во Скопје. 

Македонската компанија „Сити плаза“, новиот сопственик на „Рамстор Македонија” во чиј состав влегуваат шопинг центарот „Рамстор мол“, како и синџирот маркети „Рамстор“, во следните пет години ќе инвестира повеќе од 105 милиони евра во проширувањето и развојот на оваа компанија. Менаџерскиот тим на „Сити плаза“ денеска пред претставници на државниот врв, на дипломатскиот кор, бизнисмени и медиуми, ја претстави инвестициска програма за „Рамстор Македонија“ за периодот од 2021 до 2025, при што и свечено ја презеде компанијата под свое раководство.

Приттоа, „Сити плаза“ го презентираше и новото стратешко партнерство со холдингот „Мигрос“ од Република Турција. Оваа соработка подразбира заеднички вложувања во делот на обезбедување и франшиза на трговската марка „М“ за балканскиот регион, што ќе овозможи пристап и до други странски пазари, на кои покрај „Рамстор“ ќе се вклучат и други македонски и турски производители.

Со планираните вложувања, како што нагласи Адемоски, во следните пет години „Сити плаза” ќе го зголеми капацитетот на трговскиот центар „Рамстор мол“ во Скопје и ќе изгради подземна гаража за овој објект, ќе ја прошири продажната мрежа на „Рамстор“ маркетите за 18 нови супермаркети, како и ќе изгради три „Рамстор Retail парк” на локации низ земјава каде што „Рамстор“ во моментов не е присутен. Дополнително, инвестицискиот план предвидува изградба и модернизација на логистички центар „Рамсторе“ на површина од над 25 илјади м2, изградба на нов административно-деловен простор, инвестиции во погон за преработка и пакување на прехранбени производи, како и изградба на фотонапонска централа од 5 мегавати во Кочанско.

Со преземањето на „Рамстор Македонија“, како што истакна Адемоски, сопственик на „Сити плаза“, компанијата ќе ги задржи сите вработени, а со новите инвестиции ќе се отворат и дополнитени 700 работни места во сите сектори од работењето на друштвото. Вкупната вредност на планираните инвестиции ќе изнесува 105,2 милиони евра.

„Од неодамна, ‘Сити плаза’ донесе деловна одлука каде во својство на целосен сопственик ја презема сопственоста на ‘Рамстор Македонија’ и планира да го продолжи своето искуство и знаење во понатамошен развој и прилагодување на новите стандарди во вршење трговија ио трговска размена, како во државата, така и надвор, во Турција, Бугарија, Србија и Косово“, рече Адемоски.

Премиерот Зоран Заев во своето обраќање рече дека во време кога компаниите кај нас и секаде во светот се соочуваат со огромни предизвици заради пандемијата од Ковид-19 и поради тоа ги намалуваат трошоците и бројот на вработени, вистинска реткост е влегување во нови инвестиции и најава за нови вработувања. Еден од ретките такви примери кај нас, додаде Заев, е планот на „Сити плаза“, на бизнисменот Ајдован Адемоски по преземањето на ТЦ „Рамстор“ и истоимениот синџир маркети.

„Во оваа прилика да ја истакнам улогата на граѓаните од турската заедница за нашата земја како силна алатка на поврзување на традиционално исклучително доброто пријателство и одлична соработка меѓу Северна Македонија и Турција. Нашите две земји континуирано вложуваат во развојот на билатералните односи и пријателства и претставуваат пример за тоа како треба да се соработува во регионот и пошироко. Најдобра илустрација е присуството на голем број странски инвестиции во земјата од Турција, тоа е најголем странски инвеститор во Северна Македонија од земјите надвор од ЕУ“, рече Заев.

Додаде дека само оваа година интерес за вложување во секундарната гасификација на нашата земја изразија две големи турски компании и влегоа во завршна фаза од конкурентниот дијалог за воспоставување јавно прив атно партнерство во овој проект вреден 300 милиони евра.

Турскиот амбасадор Хасан Мехмет Секизќок истакна дека новите подвизи кои ќе ги реализира „Рамстор“ несомнено ќе дадат фидбек на економските односи на Турција и Македонија.

За значењето на инвестицијата зборуваа и Осман Арслан, главен извршен директор на Халк Банка во Р. Турција  и извршниот претседател на Мигрос Турција и претседател на асоцијација на потрошувачи, Озгур Торт.

Инаку, компанијата на Адемоски „Сити Плаза“ и поранешниот сопственик на „Рамстор мол“, компанијата „Мигрос Тиџарет“ на почетокот на февруари годинава го најавија договорот купопродажба со кој „Сити Плаза ДОО Скопје“ купи 100 отсто од акциите на подружницата „Рамсторе Бугарија ЕАД“, која поседува 99 отсто од акциите на „Рамстор Македонија“.

Холдингот „Сити Плаза“ ја започна соработката со „Мигрос“ Турција уште во 2002 година и од тогаш наваму беше партнер кој партиципираше во деловните одлуки. „Рамстор“ е еден од најголемите синџири во делот на малопродажбата во земјава, со маркети во најголемите градови. Овој бренд во Македонија започна со работа пред повеќе од деценија ипол, кога на 10 јуни 2005 година беше отворен првиот маркет во Скопје.