Пронајдено уште едно тело на дете во изгорениот автобус

„Во 21.15 часот во трагичната ноќ преку граничниот премин „Капитан Андреево“ влегле 52 патници, од нив во автобусот пронајдовме 45, а седумина се во болницата Пирогов. За жал нема уште еден спасен“, рече Сарафов.

Тој рече дека истражителот и обвинител испратени во Скопје ќе останат во Македонија до недела. Тие треба во Бугарија да ја донесат документацијата поврзана со изгорениот автобус и примероци од ДНК од роднини на загинатите. Веднаш потоа ќе почне и идентификација на жртвите.

Но, портпаролката на главниот обвинител,Сијка Милева, потврдувајќи дека е пронајдено 45-то тело, објасни дека не било забележано при првиот преглед бидејќи било многу изгорено и не е пронајдено цело тело туку само делови од него.

„Во опожарениот автобус на трагичната несреќа на автопатот Струма, при дополнителниот увид што денеска го извршија истражителите од Националната истражна служба, пронајдена е 45 жртва“, рече Милева за Сител.

Милева вели дека се уште не може да се потврди дали станува збор за тело на дете бидејќи телото е целосно јагленосано и на делови.

Во тешка сообраќајна несреќа на македонски туристички автобус на автопат во Бугарија загинаа 45 луѓе, а седуммина се повредени. Автобусот се враќал кон Скопје од туристичко патување во Истанбул.