Политичка драма во Вашингтон: Трамп го помилува осудениот конгресмен Сантос

Вашингтон – Американскиот претседател Доналд Трамп го помилува поранешниот конгресмен Џорџ Сантос, кој отслужуваше седумгодишна затворска казна за измама и кражба на идентитет, наредувајќи го неговото итно ослободување.

Во објава на социјалните мрежи, Трамп напиша дека Сантос бил „ужасно малтретиран“. „Затоа штотуку потпишав помилување со кое Џорџ Сантос веднаш се ослободува од затвор. Среќно, Џорџ, и имај прекрасен живот!“, додаде тој.

Поранешниот конгресмен беше само шестиот во историјата на САД кој беше исклучен од Конгресот, по остриот извештај на етичкиот комитет во 2023 година. Сантос, кој призна дека украл идентитети на 11 лица – вклучувајќи членови на семејството – отслужуваше казна во затвор со минимално обезбедување во Њу Џерси.

Кога беше осуден во април, судијата му рече: „Беше избран според твоите зборови – а повеќето од тие зборови беа лаги“. Сантос, според извештаите на медиумите, плачел во судницата и молел за прошка, велејќи „Не можам да го сменам минатото, но можам да го контролирам патот напред“.

Обвинителите тврдеа дека тој лажел за своето образование и кариера и дека злоупотребил пари од кампањата за финансирање на скап начин на живот.

Во својата објава, Трамп го оправда потегот напаѓајќи го демократскиот сенатор Ричард Блументал, обвинувајќи го дека лажно тврдел дека служел во американската војска. „Тоа е многу полошо од она што го направи Џорџ Сантос, а барем Сантос имаше храброст, убедување и интелигенција секогаш да гласа за републиканец!“, напиша Трамп.

Адвокатот на Сантос, Ендру Мансила, изјави за АП дека сè уште не е јасно кога неговиот клиент ќе биде ослободен. „Одбраната го поздравува претседателот Трамп за тоа што постапил правилно. Казната беше прекумерна“, рече Мансила.

Падот на кариерата на Сантос започна во 2022 година откако истрагата на Њујорк Тајмс откри дека конгресменот лажел за својата биографија – вклучувајќи ги и тврдењата дека имал факултетска диплома и работел во Ситигруп и Голдман Сакс. Потоа лагите продолжија: од кражба на пари од собирање средства за лекување на кучето, до измислување дека неговата мајка ги преживеала нападите од 11 септември.

Потоа, беа започнати локални и федерални истраги. Сантос беше обвинет по 23 кривични дела од федералната влада, а во 2023 година стана првиот член на Конгресот што беше исклучен по повеќе од две децении. Етичкиот комитет на Претставничкиот дом го обвини за користење средства од кампањата за лична употреба – вклучувајќи ботокс и претплата на веб-страницата OnlyFans.

Порано оваа недела, Сантос објави „страсна молба до претседателот Трамп“ во South Shore Press, барајќи помилување и „можност да им возврати на своето семејство, пријатели и заедница“. Тој изјави дека бил во самица во август поради смртни закани и се извини за своите постапки. „Господине претседателе, не барам сожалување, барам правда – шанса да го обновам мојот живот“, напиша тој.

Откако се врати во Белата куќа во јануари, Трамп веќе помилува најмалку двајца поранешни републикански функционери – конгресменот Мајкл Грим и поранешниот гувернер на Конектикат Џон Роуланд – осудени за даночни и корупциски прекршоци.