Откриен е можниот мотив на убиецот од Њујорк. Оставил проштално писмо
Шејн Девон Тамура (27), вооружениот човек кој вчера уби четири лица во канцелариска зграда во Њујорк пред да си го одземе животот, оставил проштално писмо во кое тврди дека страда од хронична трауматска енцефалопатија (ХTE) и бара мозокот да му се анализира по смртта, објавува Си-ен-ен.
Пронајдено писмо по пукањето
Во кратко писмо на три страници пронајдено во неговиот џеб, Тамура напишал: „Тери Лонг и американскиот фудбал ми дадоа ХTE и пиев литри антифриз поради тоа. Не можете да се борите против НФЛ, ќе ве згазнат.“
Тери Лонг, поранешен играч на Питсбург Стилерс, бил дијагностициран со ХCTE и извршил самоубиство во 2005 година. Во проштална порака, Тамура додал: „Ве молам, пребарајте ми го мозокот. Жал ми е. Кажете дека ми е жал за сè.“
Според извори на Си-ен-ен, Тамура бил фудбалер во младоста, што дополнително го поддржува неговото тврдење дека страдал од ХТЕ – болест најчесто поврзана со многубројни повторувачки удари во главата кај спортистите, дури и без регистрирани потреси на мозокот.
Напад во зградата на НФЛ
Според она што досега се знае, Тамура бил незадоволен од начинот на кој Националната фудбалска лига (НФЛ) со години го игнорирала проблемот со ХTE, што е потврдено кај бројни поранешни играчи по смртта, а многумина имаат проблеми во текот на животот. Полицијата претходно објави дека Тамура имал „историја на ментални заболувања“.
Тамура влегол во зградата каде што се наоѓа седиштето на НФЛ со пушка и почнал да пука во лобито, а потоа и на 33-тиот кат пред да си го одземе животот.
Еден вработен во НФЛ бил сериозно повреден, додека другите работници биле евакуирани на време.
Сведоштва
Школскиот другар на Тамура, Кејлеб Кларк, го опишал како „најголемиот шегаџија во класот, полн со енергија“.
„Никогаш не би помислиле дека ќе биде вмешан во насилство. Луѓето му велеа дека е талентиран и посебен, но тој никогаш не рече дека еден ден ќе игра во НФЛ“, рече Кларк.
Тамура се пресели во Гранада Хилс во 2015 година и работеше во казино во Лас Вегас, каде што имаше дозвола за оружје.