Околу 15.000 луѓе протестираа во Париз за Газа, во Берлин за Израел

Илјадници луѓе кои вееја палестински знамиња и извикувајќи „Газа, Париз е со тебе“ се собраа денеска на првите пропалестински протести дозволени од полицијата во француската престолнина, откако Хамас го нападна Израел на 7 октомври.

Околу 15.000 луѓе излегоа на Плоштадот на Републиката, според полициските податоци, за да изразат солидарност со Палестинците и да повикаат на прекин на огнот, бидејќи бројот на загинатите од израелските напади врз Газа се искачи на повеќе од 4.700.

Полицијата соопшти дека протестот е одобрен, за разлика од другите, бидејќи организаторите ги осудија нападите врз Израел во кои загинаа 1.400 луѓе.

Во четвртокот протестот беше потврден во последен момент дури откако судот во Париз ја укина полициската одлука за негова забрана, а во последните неколку дена беа одобрени и други протести во градовите низ Франција.

Сличен протест се одржа и во Брисел, а според проценките на полицијата, на него учествувале околу 12 илјади луѓе.

Протестот во Париз беше организиран од Националниот колектив за одржлив и праведен мир меѓу Палестинците и Израелците, составен од повеќе од 40 организации, меѓу кои и левичарската партија „Франција неосвоена“, синдикатот CGT и организацијата Франко-палестинска солидарност.

Во Берлин пак се одржа митинг во знак на солидарност со Израел и против антисемитизмот.Во својот воведен говор, германскиот претседател Франк-Валтер Штајнмаер им рече на собраните пред Бранденбуршката порта дека заштитата на еврејскиот живот е државна задача, „но тоа е и граѓанска должност“.

Во однос на антисемитските инциденти во последните денови, по почетокот на војната меѓу Израел и Хамас, претседателот рече дека „неподносливо е што Евреите повторно се плашат денес, и во оваа земја од сите места“. Штајнмаер истакна дека е неприфатливо еврејските родители повеќе да не ги испраќаат своите деца на училиште и дека Меморијалот на холокаустот во Берлин мора да биде заштитен од полицијата.

„Секој напад врз Евреите, врз еврејските институции е срам за Германија“, тврди тој.

Организаторите зборуваа за 25.000 учесници, додека берлинската полиција, која во голем број беше на терен, соопшти дека имало 10.000.Немаше посебни инциденти или нарушувања, изјави попладнето портпаролката на полицијата.

Многу демонстранти вееја израелски знамиња, како и транспаренти на кои пишувало „Стоп за теророт врз Евреите! и „Жалам со роднините на израелските жртви – и цивилните жртви меѓу Палестинците“.