Обвинение за Миле Јанакиески и за двокатните автобуси – штетата е 4,77 милиони евра
Поранешниот министер за транспорт, Миле Јанакиески, доби уште едно обвинение, овој пат за набавката на двокатните автобуси во Скопје. Истрагата за оваа набавка од 2008 до 2010 година покрена поранешното Специјално јавно обвинтелство, а сега Основното јавно обвинителство за гонење на организиран криминал и корупција по истражната постапка поднесе обвинителен акт до Кривичниот суд за четири лица. Меѓу нив е и сегашниот пратеник од редовите на ВМРО-ДПМНЕ, Игор Јанушев. Истрагата на СЈО беше наречена случај „Дизајн“.
Според денешното соопштение, Обвинителство за гонење на организиран криминал и корупција при спроведување постапка за јавна набавка, обвинетите како соизвршители ја искористиле својата службена положба и овластување и спротивно на Законот за јавни набавки, прибавиле корист за економскиот оператор од Република Кина. Во обвинителниот акт се вели дека четворицата незаконски го фаворизирале операторот „Јутонг“ од Кина и со него склучиле договор за набавка на 202 двокатни автобуси. Со извршените дејствија нанеле штета на Буџетот во износ од 293,7 милиони денари или 4,77 милиони евра.
Во обвинителниот акт се вели дека по три неуспешни постапки за набавка на двокатни автобуси што биле спроведени во текот на 2008 и 2009 година, во февруари 2010 година била спроведена нова постапка за јавна набавка.
„При отворање и разгледување на понудите доставени по јавниот оглас за набавка на 200 автобуси од затворен тип и два автобуси од отворен тип, обвинетите С.Ф.П. (47) како претседател и И.Ј. (36) и Ј.Ј.А. (62) како членови на Комисијата за спроведување на јавна набавка на двокатни автобуси за ЈСП на Град Скопје, во договор со првообвинетиот М.Ј. (43), постапиле спротивно на Законот за јавни набавки и фаворизирале економски оператор, кој до денот на отворањето на понудите немал доставено банкарска гаранција на понудата и сертификат за квалитет ИСО 9001:2000, како што било пропишано во тендерската документација“, стои во соопштението.
Комисијата наместо да ја отфрли понудата како некомплетна, ја продолжила постапката и извршила евалуација на двете доставени понуди. И покрај тоа што понудата на економскиот оператор од Република Бугарија била за 4.772.920 евра пониска, Комисијата го избрала економскиот оператор од Кина и му предложила на првообвинетиот да склучи договор со него.
Првообвинетиот, како што се наведува, иако знаел за недостатоците на избраната понуда, наместо да ја поништи постапката за јавна набавка поради битни пропусти, тој донел Решение за избор на најповолна понуда и склучил Договор за купопродажба на автобуси на износ од 35.425.410 евра“, се вели во соопштението.
Во него се нагласува дека обвинетите сториле кривично дело Злоупотреба на службена положба и овластување предвидени и казниво по член 353, став 5 во врска со став 1 и член 22 од Кривичниот законик.