На луѓето им треба ова животно повеќе од кога било за да преживеат. Тогаш зошто го убиваме?

Мршојадците ја демнат смртта, а смртта се чини дека ги демне мршојадците. Кога ќе помислиме на оваа птица, веднаш на ум ни доаѓаат слики од болест, нечистотија и распаѓање. Експертите велат дека овие животни имаат неоправдано лоша репутација и дека всушност се погрешно разбрани суштества.

Во супсахарска Африка живеат четири критично загрозени видови мршојадци, а непрофитната организација VulPro работи напорно за да ги заштити овие фасцинантни птици. Минатиот месец, VulPro пресели 160 Кејп и африкански белоглави мршојадци во нивниот нов дом оддалечен 1.049 километри, кој се наоѓа во приватниот резерват Шамвари.

Многу погрешни предрасуди
Во операцијата учествуваа повеќе од 50 луѓе, логистичката компанија DHL и WeWild Africa, невладина организација специјализирана за движење на животни. Експертите наведуваат дека има многу погрешни предрасуди за мршојадците.

Првата е дека тие се валкани животни.

„Мршојадците се многу педантни за нивната чистота. По хранењето, тие поминуваат часови чистејќи ги пердувите бидејќи мора да бидат во совршена состојба за лет“, рече Кери Волтер, извршен директор на VulPro.

Мршојадците еволуираа во високо ефикасни чистачи, со одлична визија што им овозможува да пронајдат трупови до шест километри. Имаат дебели и силни клунови со кои во рок од неколку часа го лупат трупот. Нивниот стомак е исклучително кисел и полн со ензими кои ги нема кај другите видови, а тие можат да го сварат она што другите животни не можат.

„Во нивниот стомак тие ги уништуваат опасните патогени како бактериите на антракс и бруцелоза, што спречува инфекција на други животни“, изјави јужноафриканскиот ветеринар Јохан Жубер.

Средства за чистење на опасните бактерии
Да нема мршојадци, околината побавно ќе ги „рециклира“ телата на мртвите животни.

„Ова може да доведе до акумулација на штетни бактерии и други патогени кои би можеле да доведат до појава на болести кај човечката и животинската популација“, вели Жубер.

Има и индиректни последици. На пример, во Индија бројот на мршојадци се намалува од 1990-тите, поради што се зголеми популацијата на диви кучиња. Резултатот е значително зголемување на случаите на беснило и смртни случаи во последните 20 години.

Волтер наведува дека во делови од КваЗулу-Натал, долж источниот брег на Јужна Африка, белоглавиот мршојадец е практично исчезнат, најмногу поради луѓето. „Коцкарите користат делови од мршојадци затоа што веруваат дека можат да ја видат иднината со нив“, рече таа.

Некои луѓе во Јужна Африка убиваат мршојадци поради нивните наводни „моќи“, верувајќи дека тоа ќе им овозможи да гледаат во иднината. Трети, пак, веруваат дека мирисањето на мозокот на мршојадецот, спиењето со черепот под перницата или носењето нога околу вратот може да донесе среќа.