Медитеранот се пече на +40°C: Франција под топлотна купола

Топлотен бран продолжува низ јужна Европа денес, со зголемен ризик од пожари, а се очекува феноменот да биде уште поинтензивен во недела во Италија, Шпанија и Португалија.

Во Франција, термометарот ќе покаже 35°C во најмалку две третини од земјата во недела и понеделник, со „многу непријатни“ ноќи во кои живата нема да падне под 20°C, изјави прогнозер за Метео-Франс. Феноменот го погоди југот на земјата втор ден по ред во саботата, а потоа се прошири кон север, носејќи зголемен ризик од пожари.

Се очекува да трае барем до вторник. Метео-Франс предвидува дека температурите ќе достигнат помеѓу 34 и 38°C во сабота попладне во департманите каде што е издадено портокалово предупредување, а на брегот „повремено ќе се приближуваат до 40°C“.

Предизвикано од топлотна купола
Причината за новиот топлотен врв во Франција е таканаречената „топлотна купола“ – голем, моќен систем со висок притисок што формира еден вид капак над одредена област, што ја блокира циркулацијата на воздухот во долните слоеви, спречувајќи го „влезот“ на временските нарушувања и во исто време постепено го затоплува воздухот. Градските власти на јужниот град Марсеј ги информираа граѓаните дека влезот во сите градски базени ќе биде бесплатен и објавија мапа на јавни места со климатизација.

Во изминатите две недели, речиси 250 преносни вентилатори се доставени до училиштата во Ница, а организирана е и дистрибуција на вентилатори за постари лица кои живеат сами.

Црвено предупредување за топлотен бран е издадено за 17 градови во Италија во сабота, вклучувајќи ги и северните градови како што се Милано, Болоња и Торино. На југот се очекуваат температури до 39°C, особено во Неапол и Палермо.

Предупредувањето за топлотен бран ќе биде проширено во 21 италијански град во недела. Некои италијански региони, како што се Лигурија и Сицилија, издадоа наредби со кои се забранува работа на отворено во најопасните часови, а синдикатите работат на проширување на спроведувањето и во други региони. Новинската агенција Анса известува дека топлината довела до пораст на повиците до службите за итна медицинска помош минатата недела.

Се очекуваат уште повисоки температури во понеделник
Во Рим, термометарот веќе покажувал 30°C во 10:00 часот по локално време, а се очекува температурите да достигнат 37°C во сабота. Слична е ситуацијата и во Венеција. Во саботата, многу туристи кои пристигнаа во Вечниот град се обидоа да се заштитат од топлината со капи и други додатоци за глава, крема за сончање или гаснење на жедта на една од јавните фонтани.

Портокалова тревога беше издадена за неколку региони во Шпанија во саботата поради високите температури што произлегоа од првиот летен топлотен бран во годината, достигнувајќи до 42ºC во некои делови од земјата, според шпанската национална метеоролошка агенција (Aemet).

Уште повисоки температури се очекуваат во недела и понеделник, кога температурите на југозападот од земјата и во некои делови од североистокот би можеле да надминат 40ºC.

„Се очекува температурите во областа на реките Гвадалкивир, Гвадијана, Тагус и Ебра да достигнат до 42 степени Целзиусови“, објави Aemet.

Поради интензивната топлина, температурата на морето на шпанскиот брег и околу Балеарските Острови „надмина 26°C, рекорд за овие датуми и типична за средината на август“, се вели во извештајот на Aemet за X, додавајќи дека последните три години биле најтоплите во шпанската историја.

Слична е ситуацијата и во Португалија. Таму, портокалова тревога беше издадена за две третини од земјата во неделата. Температурите ќе достигнат 42°C, што важи и за главниот град Лисабон, а издадено е и предупредување за огромен ризик од пожари.