Мас и Блинкен бараат ослободување на Навални

 Германскиот министер за наддворешни работи Хајко Мас изјави дека денешната казна за рускиот опозиционер Алексеј Навални е „горчлив удар“ за владеењето на законите во Русија и побара негово итно ослободување.

Денешната пресуда за Алексеј Навални претставува горчлив удар против основните слободи и владеењето на законите во Русија, напиша Мас на Твитер.

Тој истакна дека гонењето на Навални е произволно.

Навални беше уапсен на 17 јануари откако се врати од Германија, каде се лекуваше по наводното труење со нервниот гас Новичок.

Според руските власти Навални и неговиот брат финансиски ја оштетиле компанијата Ив Роше, поради што беа осудени на 3,5-годишни условни казни, а руската Федерална казнено-поправна служба побара казните да се преиначат во казна затвор по враќањето на Навални во Русија. 

САД се длабоко загрижени од одлуката на руските власти да пресудат затвор во траење од две години и осум месеци за опозицискиот лидер Алексај Навални, во замена на условната казна, соопшти денеска државниот секретар Ентони Блинкен. 

-Навални, како и секој руски граѓанин, има права кои следуваат според рускиот Устав, и Русија има меѓународни обврски да ги почитува еднаквоста пред законот и правото за слобода на говорот и слободно собирање, се вели во соопштението. 

-Повторно ја повикуваме руската Влада моментално и безусловно да го ослободи Навални, како и на стотици други руски граѓани кои во изминатите недели беа неправедно задржани само затоа што посегнале по своите права, вклучително правото за слобода на говорот и слободно собирање. 

Се наведува дека Европскиот суд за човекови права (ЕСЧП) во 2014 година заклучил дека пресудата против Навални, основа за новата пресуда, била „незаконска и селективна“ и „политичи мотивирана“.  

-Сегашниот процес против Навални, што започна со неговото апсење на 17 јануари, е продолжување на напорите за газење врз неговите права поттиснување на политичкиот плурализам, претходно заклучено и од ЕСПЧ, посочува Блинкен. 

Додава дека додека САД работат со Русија за напредок на американските интереси, Вашингтон е  во тесна координација со сојузниците и партнерите за „Русија да одговара за тоа што не успева да ги штити правата на сопствените граѓани“.