Максим Димитриевски се огради од ставовите на Бучковски за Бугарија

Откако деновиве поранешниот премиер Владо Бучковски беше поставен на специјален претставник во односите со Бугарија, многумина од владејачката СДСМ го поддржа, но има и такви кои отворено се спротивставија на изнесените ставови.

 

Меѓу вториве е и градоначалникот на Куманово, Максим Димитриевски, кој на социјалните мрежи напиша дека како активен социјалдемократ јавно се оградува од ваквите изјави кои ги смета за лични и погрешни и во ниту еден момент не можат да добијат суштинска подршка од него.

 

– Парафразирањето на Бучковски дека Македонците и Бугарите се еден народ во две држави (ставот на соседот) и повикот до нашите историчари да излезат од рамките на историографијата на поранешната држава (НОБ, АВНОЈ и АСНОМ) се чин на велепредавство.

Обидот на мала врата да се пласираат теориите дека за Бугарската страна е прифатливо дека Македонскиот народ постои од 1944 година е само потврдување на тезите дека ние сме вештачка творевина.

Ваквите изјави се спротивни на Македонските национални интереси и позиции, воедно спротивни и на Уставот и неговата Преамбула која се повикува на актите на Крушевското востание, АСНОМ и Референдумот од 91ва.

Во историјата на Македонија ваквите тези ги користеа изолирани поединци претставени од врховистичката пропаганда предводена од Ванчо Михајлов.

Денеска во 21ви век тоа го слушаме од Бучковски, поранешен Премиер исклучен од редовите на СДСМ, човек кој во партијата се обиде идеологијата да ја замени со клиентелизам, лојалност и интриги.

Како долгогодишен и активен социјалдемократ јавно се оградувам од ваквите изјави кои ги сметам за лични и погрешни и во ниту еден момент не можат да добијат суштинска подршка од мене а верувам ниту од членството а најмалку од јавноста – напиша Димитриевски.