Лавров го обвини Западот за „себичност“ во пандемијата

Рускиот министер за надворешни работи, Сергеј Лавров, го обвини Западот за неуспехот на обединувањето на глобално ниво во борбата против пандемијата и економскиот пад во обраќањето до Советот за човекови права на ОН во средата (24 февруари).

Во својот говор пред телото за човекови права на Обединетите нации, Лавров го критикуваше Западот што одби да ги суспендира санкциите во пресрет на глобалниот економски пад предизвикан од епидемијата на корона вирусот.

„За жал, и покрај пандемијата и очигледна потреба да ги консолидираме нашите напори, некои од нашите западни колеги одбиваат да ги преиспитаат своите себични начини и да се откажат од присилните пристапи и незаконските методи на заплашување и притисок“, рече тој преку видео врска.

Тој ги обвини западните земји дека имаат „желба да ја искористат пандемијата за да ги казнат ‘непожелните’ влади“.

Европската унија неделава се согласи да воведе санкции против четворица руски официјални лица поради затворањето на критичарот на Кремљ, Алексеј Навални, повлекувајќи се од одлуката за поголеми санкции.

Овој потег дополнително ги влоши односите меѓу Москва и Западот, кои забележуваат тензии на највисок степен од крајот на Студената војна.

Една опција на масата што навистина ќе му наштети на Кремљ останува да го запре проектот за гасоводот „Северен поток 2“, иако тоа не е одлука што може да се донесе на ниво на ЕУ.

ЕУ и САД ја нападнаа Русија со низа санкции откако Москва го анектираше Крим од Украина во 2014 година.

Во последните неколку недели, Украина, како и Летонија, друга поранешна советска земја, забранија голем број проруски телевизиски канали.

Лавров во својот говор остро ги критикуваше потезите, опишувајќи ги како „политичка цензура“.

„Оние кои со децении го проповедаа на слободата на говорот и изразувањето низ целиот свет, сега демонстрираат нетолеранција на алтернативните ставови“, рече тој.

Рускиот министер за надворешни работи, исто така, зборуваше за платформите на социјалните медиуми, за кои рече дека „отворено го манипулираат јавното мислење со забрана или цензура на корисничка содржина по сопствено наоѓање“.

Русија минатата година им го отвори патот на регулаторите да блокираат интернет платформи како Фејсбук и Јутјуб доколку се смета дека имаат цензурирана содржина произведена од Руси. (АФП)