Колку царините на Трамп може да го поскапат ајфонот

Ајфонот на Епл (Apple) наскоро би можел да стане значително поскап. Американскиот претседател Доналд Трамп воведе високи царини, што може драстично да ја промени глобалната трговија, а според аналитичарите, најпогодени би можеле да бидат производите за широка потрошувачка како ајфон (iPhone). Доколку Епл ги пренесе трошоците на клиентите, цените би можеле да се зголемат за 30 до 40%.

Повеќето ајфон телефони сè уште се произведуваат во Кина, која е погодена со царини од 54%. Доколку овие тарифи останат на сила, Епл ќе се соочи со тешка одлука: да ги апсорбира дополнителните трошоци или да ги пренесе на потрошувачите. Акциите на Епл паднаа за 9,3% во четвртокот, што беше нивниот најлош ден од март 2020 година, пренесува Ројтерс.

Епл продава повеќе од 220 милиони ајфони годишно, а најголемите пазари му се САД, Кина и Европа. Најевтиниот модел ајфон 16 беше лансиран во САД со почетна цена од 799 долари. Сепак, според проекциите на аналитичарите од Rosenblatt Securities, цената би можела да порасне до 1.142 долари доколку Епл одлучи да ги пренесе трошоците на клиентите.

Поскапиот модел ајфон 16 про макс, со екран од 6,9 инчи и 1 TB меморија, моментално се продава за 1.599 долари, но може да достигне и до речиси 2.300 долари.

Дури и во неговиот прв претседателски мандат, Трамп воведе царини за широк опсег на кинески увоз со цел да ги охрабри американските компании да го вратат производството во САД или да го преселат во земји како Мексико, но потоа Епл успеа да добие исклучоци. Овој пат се уште нема исклучоци.

„Целата оваа приказна со тарифите се развива целосно спротивно на нашите очекувања. Мислевме дека Епл како американска икона ќе биде поштедена“, вели Бартон Крокет, аналитичар во Rosenblatt Securities.

Ајфон 16e, претставен во февруари како поевтина опција за функциите за вештачка интелигенција на Епл, чини 599 долари. Зголемувањето на цената од 43% би значело цена од 856 долари, а цените на другите уреди на Епл би можеле значително да пораснат. Многу корисници ги исплаќаат мобилните телефони преку договори со мобилните оператори во текот на две или три години.

Епл допрва треба да објави официјално соопштение.

Но, некои аналитичари истакнуваат дека продажбата на ајфон веќе стагнира на големите пазари бидејќи вештачката интелигенција на Епл, пакет на функции кои овозможуваат сумирање на известувања, уредување на е-пошта и пристап до ChatGPT, не успеа да ги возбуди корисниците.

Експертските прегледи сугерираат дека, иако иновативни, овие функции не се доволно привлечни за да го оправдаат префрлањето на нови модели. Падот на побарувачката може дополнително да им наштети на финансиските резултати на Епл, особено ако цените се зголемат поради царините.

Анџело Зино, аналитичар во CFRA Research, рече дека Епл тешко дека ќе може да пренесе повеќе од 10% од трошоците на потрошувачите: „Очекуваме Епл да го одложи големото зголемување на цената до есента, кога ќе излезе ајфон 17, бидејќи тоа е вообичаена практика за планирани зголемувања на цените.

Нил Шах од Counterpoint Research проценува дека Епл ќе мора да ги зголеми цените во просек за најмалку 30% за да ги надомести трошоците за увозните давачки. Наглото зголемување на цената може да ја намали побарувачката за ајфони и да му даде предност на јужнокорејскиот Самсунг, бидејќи таа земја има значително пониски тарифи од Кина, каде што се произведуваат сите ајфони за американскиот пазар.

„Нашите брзи пресметки на денот на „тарифната револуција“ на Трамп сугерираат дека ова може сериозно да го погоди Епл, со потенцијална загуба до 40 милијарди долари. Тешко ни е да замислиме дека Трамп ќе се закани на една од американските икони, но ситуацијата изгледа прилично сериозна“, рече Крокет од Розенблат, додавајќи дека се веројатни преговори меѓу Епл, Кина и Белата куќа.