Израел ја открил машината за пари на Хамас уште во 2018. Никој не презел ништо, открива „Њујорк тајмс“

Израелските разузнавачи добија сеопфатни детали за огромните финансиски операции на Хамас во 2018 година, но не направија ништо за да ги затворат и да го запрат протокот на средства за милитантната група, се вели во извештајот од саботата.

Овие исти средства веројатно биле клучни за подготовките на Хамас за смртоносните напади на 7 октомври, објави „Њујорк тајмс“, цитирајќи израелски и американски претставници.

Во извештајот се детализирани документите пронајдени на компјутерот на висок функционер на Хамас во кои се наведени имоти ширум светот во вредност од стотици милиони долари. Документите укажуваат на судански компании во сопственост на Хамас кои се занимаваат со рударство, живинарски фарми и изградба на патишта, два облакодери во сопственост на групата во Обединетите Арапски Емирати и други деловни потфати поврзани со имот во Алжир и Турција.

И покрај пристапот до документите и потенцијалниот пат кон прекинување на средствата на Хамас, ништо не беше направено. И Израел и САД работеа под претпоставката дека Хамас е повеќе заинтересиран за владеење со Појасот Газа отколку за конфликт со Израел, и наместо тоа се фокусираше на спроведување санкции против Иран.

„Сите зборуваат за неуспеси на разузнавањето на 7 октомври, но никој не зборува за неуспехот да се запрат парите“, изјави за „Њујорк тајмс“ Уди Леви, поранешен шеф на одделот за економска војна на Мосад. „Парите – парите – го дозволија ова“.

Леви беше дел од тимот што ги истражуваше финансиите на тероризмот наречен Task Force Harpoon, кој ја следеше паричната мрежа на Хамас во текот на неколку години. До 2015 година тие го пронајдоа она што го нарекоа „тајно инвестициско портфолио на Хамас“, се вели во извештајот.

Во еден момент, средствата изнесуваа околу 500 милиони долари.

Леви рече дека лично го информирал премиерот Бенјамин Нетанјаху за финансиите на Хамас во 2015 година.

  „Можам со сигурност да ви кажам дека разговарав со него за ова“, рече Леви. „Но, тој не се грижеше толку за тоа“.

Набргу потоа, тогашниот шеф на Мосад, Јоси Коен, ја затвори оперативната група Харпун како дел од реорганизацијата на агенцијата, рече Леви.

Разузнавачките агенти продолжија да ги следат парите, но без истата структура за поддршка што постоеше во рамките на работната група.

Во 2018 година, Израел успеа да добие пристап до книгите, создадени од книговодител по име Махмуд Газал, што ја исцрта досега најјасната слика за широчината на финансиските интереси на Хамас.

„Тоа беше голем напредок“, рече еден официјален претставник. „Хамас може да се скрие зад фронтмени и акционери, но парите секогаш зборуваат“.

Во исто време, Саудиска Арабија го уапси Газал, кој престојуваше во земјата, откако корпоративните досиеја ја открија неговата и вмешаност на други лица во 18 компании означени во документите.

По овие откритија, „Њујорк тајмс“ рече дека израелскиот истражен тим ги споделил своите наоди со американските колеги со надеж дека тоа ќе доведе до финансиски санкции.

Сепак, ниту Израел ниту САД не ја следеа оваа опција, бидејќи високи функционери во Израел ги притискаа САД да воведат санкции кон Иран.

Истата,2018 година, Нетанјаху одлучи да дозволи милиони долари во Појасот Газа преку Катар, верувајќи дека тоа ќе го замолчи Хамас и ќе го обесхрабри од војна.

Во извештајот, исто така, се истакнува дека нашироко се пишува оти тој приватно коментирал дека го сметал зајакнувањето на Хамас како корисно, бидејќи тоа ги држи Газа и Западниот Брег поделени и го задржа притисокот да продолжи со дипломатски преговори со Палестинската управа.

Дури во мај 2022 година, американското Министерство за финансии објави финансиски санкции против експанзивната финансиска мрежа на Хамас.

„Хамас генерира огромни суми на приходи преку своето тајно инвестициско портфолио додека ја дестабилизира Газа, која се соочува со тешки животни и економски услови“, рече тогаш помошникот секретар на Министерството за финансии за финансирање терористички и финансиски криминал, Елизабет Розенберг.

Списокот на санкционирани лица го вклучуваше Ахмед Шариф Абдалах Одех, јордански државјанин кој го предводеше меѓународното инвестициско портфолио на Хамас до 2017 година и остана вклучен дури и по повлекувањето од функцијата.

Тој беше заменет со Усама Али, кој во 2019 година беше назначен во Шура Советот на Хамас – квази-законодавна гранка – и подоцна служеше во Извршниот комитет на Хамас, одржувајќи директен контакт со шефот на политичкото биро на Хамас, Исмаил Ханије, заменик-шефот на бирото Салех ал-Арури и други.

Сите оние што беа санкционирани од САД во 2022 година беа именувани во книгите доставени до САД од израелските разузнавачки агенти години претходно.

Говорејќи за „Њујорк тајмс“, Тамир Пардо, кој беше на чело на Мосад во 2011-2016 година, рече дека не знаел што се случило откако тој се повлече и во кој момент Коен ја распушти оперативната група Харпун.

„Верувам дека ако некој ги бркаше парите и ги запреше“, рече тој, „немаше да ги видиме резултатите од она што го гледаме денес“.

„Њујорк тајмс“ забележа дека Нетанјаху одбил да одговори на наводите од извештајот.