Фудбалската легенда Франц Бекенбауер почина на 78 години

Легендата на германскиот фудбал, Франц Бекенбауер, почина во неделата на 78-годишна возраст, како што во понеделникот соопшти неговото семејство за германската агенција ДПА. „Со длабока тага објавуваме дека мојот сопруг и нашиот татко Франц Бекенбауер почина мирно во сон вчера, недела, опкружен со своето семејство“, соопшти семејството. „Бараме да можете да тагувате во тишина и да се воздржите од поставување какви било прашања“.

Бекенбауер важи за една од најважните фигури во германскиот и светскиот фудбал. Поради неговото исклучително фудбалско знаење и елеганцијата во играта беше наречен „кајзер Франц“. Како играч, најуспешниот и најформативен период го имаше во Баерн Минхен, каде што играше од 1964 до 1977 година. Со Баерн го освои европскиот Куп на шампиони во 1975, 1976 и 1977 година, а со германскиот национален тим титулата светски првак во 1974.. Беше активен и за спортскиот клуб Хамбург и њујоршкиот Космос.

Во неговата подоцнежна кариера како тренер, тој повторно го освои Светското првенство кога германската репрезентација победи во Италија во 1990 година. Тој е само еден од тројцата фудбалери кои станаа светски шампиони како играчи и тренери.

По неговото време како тренер и клупски функционер, Германскиот фудбалски сојуз се обиде да го искористи сјајот на „светлата фигура“ за Светското првенство во Германија во 2006 година и го направи претседател на организацискиот комитет. Неговата улога таму подоцна фрли сенка врз неговото животно дело во текот на истрагите за летната бајка и сомнителните плаќања во милиони.

Работите станаа потивки околу Бекенбауер во последните години. Неодамна имаше сѐ повеќе вести за неговата лоша здравствена состојба. „Не му оди добро. Тоа е постојано горе-долу“, рече неговиот брат Валтер во документарецот на АРД за животот на Франц Бекенбауер. Филмот за прв пат ќе се емитува еден ден по годишнината од неговата смрт.