Франција шокирана од фаталниот напад со нож во средно училиште
Уапсено е момче на 15 години. Една ученичка е убиена во приватното средно училиште во Нант
Францускиот премиер, Франсоа Бајру, повика на преземање мерки против тинејџерските злосторства со нож откако средношколец избоде четири други деца во неговото училиште, убивајќи најмалку едно и повредувајќи ги другите пред да биде уапсен.
Петнаесетгодишникот наводно нападнал соученици со нож за време на паузата за ручек во четвртокт во приватното средно училиште „Нотр-Дам-де-Тут-Еид“ во градот Нант на атлантскиот брег. Нападот се случил околу 12,30 часот, пред наставниците да го совладаат момчето. Една ученичка е убиена. Најмалку уште еден ученик е во критична состојба во болница.
„Оваа трагедија уште еднаш го покажува ендемското насилство што постои кај дел од нашата младина“, рече Бајру во соопштението. „Мора да се постават фундаментални прашања во однос на образованието, вредностите и почитувањето на човечкиот живот.“
Тој нареди веднаш да се интензивираат проверките во и околу училиштата. Тој исто така рече дека комисија ќе разгледа како да се справи со тинејџерските злосторства со нож во однос на продажбата на оружје и поседувањето и носењето ножеви. Ќе се проучуваат најдобрите практики во други земји низ целиот свет.
Фалејќи ја „храброста“ на наставниците кои интервенираа, францускиот претседател Емануел Макрон рече дека целата нација го дели шокот и тагата во училиштето.
Полициски извор за „Франс инфо“ изјави дека момчето прво нападнало ученик на вториот кат од училиштето, а потоа нападнало уште тројца кога се симнувале по скалите. Влегол во две училници, рекол изворот. „Франс инфо“ исто така објави дека момчето носело два ножа.
Момчето е во полициски притвор и се врши психијатриска проценка, објави Франс телевизион.
Министерката за образование, Елизабет Борн, и министерот за внатрешни работи, Бруно Реталјо, отпатуваа во училиштето за да покажат „солидарност со жртвите и училишната заедница“.
Сликите од местото на настанот покажаа полиција и војници како го опкружуваат училиштето додека започнува истрагата.
Службеник во училиштето, кое е дел од комплекс во кој се сместени основно и средно училиште, не сакал да коментира што се случило. Тие рекле дека училиштето се концентрира на грижата за учениците кои биле на кампусот во тој момент.