Александра Јовановска, шеф на прес-службата на Евросонг: Јавноста ќе ја слушне „Lost and Found“ на „Ај Кју“ в недела


Александра Јовановска, новинар во МТВ, и уредник и водител на музичката емисија „Стисни плеј“, шест години работи како шеф на прес-службата на македонската евровизиска делегација. Прва Евровизија ѝ беше со Есма и Лозано во Малме, Шведска, во 2013 година.

Позитивна, весела, вечен оптимист, борбена, со многу енергија, креативна, полна со идеи, работи и по 24 часа… Евросонг ѝ е во крвта, а нејзините емисии за најпрестижниот музички настан во Европа веќе десет години се препознатливи по високиот професионализам и ентузијазам.

Заедно со Мери Попова, која и годинава е шефица на евровизиската делегација, се најповикани да коментираат за темата Евросонг кој годинава се одржува во мај, во Лисабон, Португалија. Александра ни ги сподели најновите информации околу подготовките за нашето претставување во Лисабон.

МРТВ ја избра „Lost and Found“ на „Ај Кју“ за наш евровизиски претставник во Лисабон, Португалија. Дали песната се врти низ радио и ТВ-етерот или ќе биде посебно промовирана?

– Евровизиската песна „Lost and found“ со која „Ај Кју“ ќе ја претстави Македонија на 63. издание на Евровизија, кое годинава се одржува од 8 до 12 мај во Лисабон, Португалија, првпат премиерно ќе биде прикажана в недела на 11 март. Песната ќе биде промовирана со видеозапис во Дневник 2 на МРТ во 19:30. Режисер на видеоспотот е Јован Куциновски. Автор на музиката и текстот на песната е гитаристот и вокал на групата Бојан Трајковски, а за аранжманот и продукцијата се погрижи Дарко Димитров.

Секогаш за победникот се крева прашина, секогаш има за или против, им се допаѓа или не. На конкурсот пристигнаа над 300 песни. Каков беше квалитетот на пристигнатите песни? Лесно е да критикуваш кога не се знаат работите.

– Можам да кажам дека сме задоволни од пристигнатиот број песни, имаше 382 од кои само 30-ина беа од македонски автори. Наспроти тоа, имаше голем број песни од странски автори, некои одлични, други сосема просечни, а и многу такви што не сакате да ги слушате ни по првите триесет секунди. Луѓето од тимот во МРТ имаа можност да ги слушаат песните цело време, како што пристигнуваа беа предмет на анализа меѓу нас, а тоа што ме радува е дека на денот на официјалното преслушување речиси едногласно се потврдуваа нашите претходни размислувања од сите останати членови на професионалното жири. На крајот„Lost and Found“ беше песна која се издвои од останатите, а сите се согласија дека нема потреба да се бара пејач и дека може да им се понуди во пакет на „Ај Кју“, за тие да бидат нашите евровизиски претставници. Македонските автори сметам дека беа креативни со своите идеи, за разлика од многу синтетички песни од странските автори што наликуваа една на друга. Сум била член на жири на сите македонски фестивали, дали во селекција на песни или во финалното бодирање, секоја година сум дел и од некое интернационално жири на останатите земји што учествуваат на Евровизија и јавноста треба да знае дека не сите песни што пристигнуваат на вакви конкурси се врвни уметнички дела. Па, колку хитови имаме во годината што се вртат по радиостаниците?! На крајот сѐ се сведува на десетина песни од кои се прави финалната селекција, а ние особено, можеби дури и потсвесно, голем приоритет им дадовме на нашите автори. Очекувам да бидат објавени нивните песни и да ги слушнеме на радиостаниците.

Кои се следните промотивни активности за победничката песна?

– И оваа година ќе има одредени промотивни настани на кои „Ај Кју“ ќе се сретнат со медиумите кои се специјализирани за овој настан, евровизиските фанови и, секако, ќе ја презентираат песната во живо. Овие настани се одлична можност за изведувачите да стекнат искуство, да го запознаат теренот и многу порелаксирано и со намален стрес да влезат во финалните две недели од целата таа приказна, која бара исклучителна подготвеност и енергија. Деталите за промотивната турнеја ќе следуваат по објавувањето на песната.

Кога ќе се снима спот или разгледница?

-И оваа година разгледницата се снимаше во земјата домаќин. Темата е „Добредојдовте во Португалија“. „Ај Кју“ веќе беше во Лисабон, а секоја разгледница на свој начин ќе ги открива убавините на Португалија, нејзините културни посебности, историски знаменитости и природни убавини. Приказната што ќе ни ја доловат членовите на „Ај Кју“ останува тајна до нивниот настап на 8 мај.

Дали е прерано ако прашаме кој ќе се погрижи за стајлингот на „Ај Кју“?

-Да, ама детали ексклузивно ќе откриеме вечерва во 20:15 часот, во емисијата „Стисни плеј“.

Препознатлива си по емисиите за Евросонг кои ни ја доближуваат атмосферата од музичкиот настан, најголем во Европа. Пренеси ни дел од атмосферата.

– Со голем ентузијазам ги правам овие емисии веќе десет години. Како дел од тимот, шеста година имам можност да го правам тоа и во живо од самиот настан. Во првите години амбициите одеа дотаму што секој ден имаше емисија, цели две недели, што подразбираше многу снимања, многу прегледувања на материјалите, селекција, превод и голема координација со тимот на монтажери во МТВ. Често немало многу време за спиење знаејќи колку и каде сѐ треба да си присутен за време на тие евровизиски денови, но навистина мислам дека нашата публика заслужува да биде дел од таа магија и да биде информирана што и како се случува со нашиот претставник тие денови. Ние сме мал тим, секој покрива неколку работи, јас не сум само новинар за Евровизија, туку и шеф на прес, постојано сум во комуникација со две илјади акредитирани новинари и секогаш блиску до нашиот претставник за сите нивни интервјуа, прес-конференции. По сите проби, јас останувам со нашиот претставник уште неколку часа во прес-центарот, за да ги дадеме сите изјави, но засега добро ми оди, сѐ уште имам доволно енергија за еден ваков динамичен настан, кој освен тоа што е најгледаниот музички и телевизиски спектакл, е и забавно шоу и во таков дух едноставно мора да минуваат и деновите на Евровизија.

Кој Евросонг ќе го паметиш по совршена организација, а кој по убавина на градот?

– Евровизија е секогаш иста, се одвива по некоја утврдена шема, прес-центарот е ист, делегацискиот простор исто така, секоја година се среќаваме со истите луѓе од организацијата или од останатите делегации. Ако треба да издвојам, тогаш би рекла дека Евровизијата во Шведска во 2016 година беше одлична, таа година дури и Џастин Тимберлејк беше дел од ревијалната програма. Ќе ја споменам и Евровизијата во 2015 година. Според мене, Виена беше најдобриот град домаќин, кој навистина сакаше несебично да ги сподели сите свои убавини со големиот број посетители. Виена таа година беше интересна дури и за мене, иако претходно барем петпати ја имав приватно посетено. Таа година и ние како делегација добивме огромна поддршка и добредојде и од амбасадорката на Македонија во Австрија, г-ѓа Василка Поповска-Треневска.

Лејла Сабит