За да не им падне покривот на глава, учениците од ОУРЦ „Иднина“ од септември времено ќе учат во друг објект

Учениците од основното училиште со ресурсен центар „Иднина“ во Чаир, од септември времено ќе посетуваат настава во простории на Државното средно училиште за рехабилитација и образование „Св. Наум Охридски“ во Центар, каде за оваа цел, со поддршка од Стопанската комора Македонија – Турција (МАТТО) ќе се адаптираат и реконструираат простории што досега не се употребувале.

Речиси 200 ученици кои учат со посебни образовни програми од скопскиот ијугоисточниот регион го посетуваат оваа училиште како редовни ученици или повремено, но просториите изградени во 1963 година, сега се опасни за нив и за вработените, затоа што се азбестни и нагризани од времето, па Министерството за образование планира изградба на нова зграда. Но, тоа е процес што ќе потрае,  а како што уверува министерката за образование Весна Јаневска, ако теемелите се постават оваа или следната година, објектот ќе биде изграден. Сепак, дотогаш, овие ученици ќе посетуваат настава во прилагодени простории од училиштето „Св. Наум Охридски“ во Центар.  

Но, и оваа мала промена со која на учениците ќе им се пружат соодветни услови, не се случува без помош од општествено одговорни компании, во случајов, со помош на македонско-турската стопанска комора МАТТО. 

Претседателот на управниот одбор на комората, Ајдован Адемоски, министерката Јаневска и  училишниот директор потпишаа договор за донација врз основа на кој ќе се реализираат градежните работи.

Јаневска рече дека Владата сериозно пристапува кон надминување на бројните наследени предизвици во образованието, а решенијата полесно се наоѓаат и остваруваат со поддршка од партнерите и соработниците, меѓу кои е и МАТТО, која во оваа ситуација, одвојува 100 илјади евра.

„Комората ќе помогне во реновирањето и адаптирањето на простории во ова училиште, со цел, до септември да бидат оспособени за привремена настава и образование на учениците од основното училиште со ресурсен центар „Иднина“ во општина Чаир кое е во катастрофална состојба и бидејќи претставува ризик по здравјето и животот на децата и вработените, објектот е затворен, а се плаира изградба на нов“, рече Јаневска.

Информираше дека околу 70 редовни основци од „Иднина“ и 130 со кои се работи по индивидуални програми, ќе имаат пристап до безбедно и квалитетно образование од септември, а наставата во адаптираните простории ќе се одвива во две смени. Јаневска
апелираше општествената одговорност на МАТТО Комората да биде пример кој ќе го следат и другите комори, организации и здруженија, затоа што, како што посочи, развојот на образованието треба да биде заедничка општествена мисија од чие остварување, корист имаме сите.

Претседателот на Комората, Ајдован Адемоски рече дека сите деца заслужуваат еднаков пристап до квалитетно образование и дека особено внимание треба да им се посвети на учениците со попреченост за да го достигнат својот полн потенцијал.

Комората ќе продолжи да помага секаде каде што има потреба и согласно можностите. Јаневска рече дека уште сега се разговара со Комората за помош и при изградбата на новото училиште „Иднина“ на местото на старото, а во дворот на истото училиште се планира уште едно училиште за потребите на учениците од Чаир.