Велика Британија и САД во преговори: Трамп „да го направи Холивуд повторно голем“

Тарифите за филмови ќе бидат дел од трговските преговори меѓу Велика Британија и Соединетите Американски Држави, откако американскиот претседател Доналд Трамп се закани дека ќе воведе тарифи од 100 проценти за филмови снимени во странски земји, јавува Би-би-си.

Во неделата, Трамп изјави дека ќе воведе царини за филмови произведени во странство за да ѝ помогне на американската филмска индустрија, која, според него, „умира многу брзо“.

Британската влада објави дека трговските преговори со Вашингтон се во тек и дека зазема „мирен и стабилен пристап“ кон преговорите во обид да го намали притисокот врз британските компании.

Британските филмски работници предупредија дека многумина во индустријата ризикуваат да ги изгубат своите работни места ако се прекине американското производство, а еден синдикат рече дека царините би можеле да бидат последниот удар во тој поглед, пишува Би-би-си.

Портпаролот на Белата куќа, Куш Десаи, денес изјави дека не се донесени конечни одлуки за новите американски царини за странски филмови, објави Си-ен-ен.

Десаи рече дека иако не се донесени конечни одлуки за американските царини за странски филмови, администрацијата ги истражува сите опции за исполнување на директивата на Трамп „да го направи Холивуд повторно голем“.