Утрово запалена депонијата во Делчево – регионалната во Мечкуевци во застој

 Во Делчево денеска се одржа воведна работилница во рамки на процесот за усогласување со Поглавје 27 од ЕУ-преговорите, посветена на темата „Справување со отпадот“ и подготвеноста на општините Делчево, Берово, Македонска Каменица и Пехчево за новите еколошки предизвици.

На настанот се обрати Зоран Биковски консултант во проектот, кој потенцираше дека институциите се наоѓаат пред сериозни задачи и обврски, особено во контекст на затворањето на постоечките депонии и отворањето на новата регионална депонија во Светиниколско – Мечкуевци.

-Службите се подготвуваат, но од друга страна мора да обезбедиме вистинска вклученост и на граѓанските организации. Транспарентноста и отчетноста мора да се зголемат – граѓаните од овој регион со години се соочуваат со сериозни проблеми како што се дивите депонии, несоодветното селектирање на отпадот и загадувањето на животната средина“, рече Биковски. 

Тој додаде дека е неопходно конечно решавање на долгогодишните проблеми со отпадот, а не само привремени и површни интервенции.

-Сакаме сите да добиеме – почиста животна средина и подобро здравје. За тоа, мораме а ги вклучиме сите: институциите, партиите, граѓаните. Да дејствуваме како едно семејство, заклучи тој. 

Биковски повика на примена на европските стандарди и вредности, истакнувајќи дека во многу земји на ЕУ само 40 отсто од отпадот завршува на депонии, додека остатокот се селектира и преработува. 

Регионалниот центар во Свети Николе, како што додаде проектниот координатор Весна Коловска, сѐ уште e во застој.

-Состојбата на теренот е далеку од идеална, со многу постоечки депонии кои не ги исполнуваат стандардите. Во разговорите со општините видовме дека сѐ уште нема чуварски служби на некои депонии. Поради тоа тие често се палат, особено во летниот период. Ова не е одржливо решение, рече Коловска. 

Таа посочи дека регионалната депонија во Свети Николе се уште не добила целосна согласност за започнување со работа, а тендерската постапка за избор на оператор сѐ уште е во тек.

 -Нам ни треба не само инфраструктура, туку и човечки капацитет – луѓе кои ќе го водат системот и ќе обезбедат негово функционирање во согласност со стандардите, истакна Коловска.

Работилницата се одржува во период кога градската депонија Острец во Делчево утрово повторно беше запалена од несовесни граѓани. Токму поради ова учесниците посочија дека итно е потребно решение со цел ваквите состојби да се еведат на минимум.