Тажни слики оставија пожарите во селата во Кумановско (Галерија)
Пожарите во Кумановско се изгаснати, соопштија попладнево надлежните, но мирисот на изгорено, пеплосани, куќи, плевни со жито, фарми со стока, изгорени ниви ве дочекуваат штом завлезете во селата кои неколку дена се бореа со огнената стихија.
Ивица Петровиќ, жител на селото Четирце, денеска си го расчистуваше имотот, односно она што остана откако пламените јазици му ја изгореле фармата на која чувал 11 крави, а изгорела и плевната со жито.
Пожарот помина, штетата е направена, но животот оди понатаму, па тој со своите две раце и помош од сопругата се обидува да се издигне од пепелта.
Тажно е да се погледне во остатоците од шталата, каде до пред некој ден ги молзеле кравите и им фрлале сено за храна. Мириса на оган, чад, изгорено, печено… Во аголот се забележуваат нагорени ќерамиди, а Петровиќ го преместува она што е здраво во цврст изграден објект. Огнот сега го нема, ама кој знае, може пак да се врати.
Слично е и во селата во близина. Изгорени куќи, плевни, кошници со пчели, овоштарници, ниви… Некои велат изгорени се и црквички повисоко во планината, но таму сè уште не е безбедно да се појде, ниту пак може да се стигне на вистинското место, ако некој од мештаните не ве однесе.
Сепак, и овие слики доволно кажуваат за пустошот што зад себе го остава огнот. Дали почнал од палење стрништа, или несовесност при правење скара, дали е човечки фактор или почнал сам од себе, воопшто не е важно. Луѓето како Петровиќ остануваат без сè што досега граделе, печалеле, вложувале. Почнуваат од почеток.
На подрачјето на Кумановско во моментот нема активни пожари, информира попладнево градоначалникот Максим Димитриевски. Пожарот во село Бељаковце и Довезенце е изгаснат, но теренот дополнително ќе се пребарува. Според командирот на територијалната противпожарна единица, Куманово, Дејан Илиевски, на таа локација ќе остане дежурна екипа.
– Благодарност до сите тимови кои пет дена работеа на гасењето на пожарите во Куманово и регионот. Остануваме во приправност, подготвени да помогнеме на другите општини, напиша Димитриевски.
Денеска седница одржа и Општинскиот штаб за заштита и спасување кој апелира граѓаните да се воздржат од палење стрништа и отпаден материјал во дворови и на отворен простор за да се спречи настанување пожар. Од Штабот ги повикаа граѓаните да пријават до надлежните институции сомнителни движења на лица и возила, можни причинители на пожари.
Во продолжение погледнете ги фотографиите на нашиот фоторепортер Б. Грданоски:
