Стопанските комори на Украина и Северна Македонија потпишаа меморандуми за соработка

На иницијатива на Амбасадата на Украина во Република Северна Македонија и Стопанската комора на Украина, како и со помош на Советот на извозници и инвеститори при Министерството за надворешни работи на Украина и Министерството за надворешни работи на Северна Македонија, на 7 април 2021 година се одржа Првиот украинско-македонски онлајн настан посветен на развојот на соработката помеѓу водечките организации на претприемачи на Украина и Северна Македонија (Стопанските/Економските комори), соопштиа од украинската амбасада.
Притоа на онлајн настанот биле презентирани потенцијалот, можностите и насоките на соработка во областа на развојот на билатералната трговија и промоција на бизнисот,  а биле дискутирани и новите современи форми на соработка, особено во контекст на тековната пандемија на коронавирусот.

Претседателот на Стопанската комора на Украина Г.Д. Чижиков го истакнал неодамнешното назначување на претставник во Северна Македонија Александар Урбанович како чекор кон исполнување на потребите на деловната заедница на двете земји за наоѓање на партнери и развој на заемно корисна трговија.
Во рамките на онлајн состанокот се одржа и виртуелно потпишување на Меморандуми за разбирање и соработка помеѓу Советот на извозници и инвеститори при Министерството за надворешни работи на Украина и водечките Стопански комори на Северна Македонија. Документите се насочени кон олеснување на заемно корисната соработка меѓу страните, размена на корисни информации од областа на трговијата и претприемништвото, спроведување на заеднички настани со учество на водечките компании извознички на двете земји и промовирање на нивното учество на изложби, форуми, трговски мисии и слично, се вели во соопштението до медиумите.

Трговска размена меѓу Украина и Северна Македонија во 2020 година била за речиси 50 осто поголема достигнувајќи 101 милион американски долари. Тоа, како што ссе вели во соопштението, стана најдобриот показател во билатералната трговија во изминатите осум години и позитивен тренд за зголемување на обемот на трговската размена, кој продолжува и оваа година (двојно повеќе во првиот квартал од оваа година).

Инаку, на настанот присуствувале директорот на Одделот за економска дипломатија на Министерството за надворешни работи на Украина Дмитро Пономаренко, Претседателот на Стопанската комора на Украина Геннадиј Чижиков, Амбасадорката на Украина во Северна Македонија Наталија Задорожњук, Амбасадорот на Република Северна Македонија во Украина Крум Ефремов, помошник директор на директорат на економска дипломатија во Министерстерството за надворешни работи на Северна Македонија Амбасадор Илија Псалтиров и раководителите на трите Стопански комори на Северна Македонија.