Столтенберг: Со нетрпение ја очекуваме Северна Македонија во НАТО

Генералниот секретар на НАТО, Јенс Столтенберг на Твитер објави дека телефонски разговарал со премиерот Зоран Заев со цел да ја реафирмира посветеноста на Алијансата на членството на Северна Македонија.

– Добар телефонски разговор со премиерот Зоран Заев за реафирмирање на посветеноста на НАТО на членството на Северна Македонија. Процесот на ратификација е во тек и со нетрпение очекуваме Северна Македонија наскоро да и се приклучи на нашата Алијанса, објави Столтенберг.

Владината прес-служба соопшти дека премиерот Заев и генералниот секретар на НАТО Столтенберг во телефонскиот разговор размениле мислења за одлуката на Европската Унија да го одложи стартот за преговори на нашата земја за членство во Унијата.

Премиерот Заев, како што е наведено во соопштението, му го пренел на генералниот секретар Столтенберг расположението на граѓаните на земјата од историската грешка на ЕУ да не ги одобри очекуваните преговори за пристапување во полноправно членство како разочарувачко и фрустрирачко, наспроти фактот дека Република Северна Македонија ги исполни сите услови.

– Тоа не треба и нема да влијае и на остварувањето на втората од двете најголеми стратешки цели на државата – членството во ЕУ, и од спроведувањето на реформите до крај за да ги имплементираме европските вредности во сите наши институции, во сите пори на нашето живеење, истакнал претседателот на Владата на Северна Македонија Заев во разговорот со Столтенберг.

Во телефонскиот разговор со Столтенберг, премиерот Заев се заблагодарил за поддршката на НАТО во нашите евроатлантски интеграции и истакнал дека Северна Македонија останува посветена на заокружувањето на процесот за полноправно членство во алијансата, како нејзин стратегиски и суверен избор да биде следната, 30-та земја членка.

Премиерот Заев го информирал генералниот секретар на НАТО за резултатите од вчерашната лидерска средба кај претседателот Пендаровски и за заеднички договорената согласност за организирање предвремени избори на 12 април идната година.