Стивен Кинг тврди дека ова е најлошата филмска адаптација на книга досега

Стивен Кинг несомнено најдобро знае како е кога книгите се „претворени“ во филм – и кога тргнува наопаку. Неговите дела не само што се меѓу најчитаните во историјата, туку се префрлени и на филмското платно повеќе од 50 пати. Додека некои филмови постигнале култен статус, како што се „Бегството од Шошенк“, „Сјаење“, „Мизерија“ и „Зелената милја“, други наидоа на остри критики – вклучувајќи и некои што самиот Кинг ги сметал за неуспешни.

Еден од примерите што ги издвои како лоша адаптација е филмот „Денот на делфинот“, базиран на романот на Роберт Мерл. „Понекогаш совршената книга станува ужасен филм. Мојот омилен пример за тоа е „Денот на делфинот“; мислев дека е прекрасна книга, но Мајк Николс едноставно не ја направи добро“, рече Кинг, според списанието Far Out.

Иако филмот се обиде да остане верен на оригиналот – вклучувајќи ја и приказната за  делфинот што зборува – публиката и критичарите го сметаа за неубедлив и неуспешен. Самиот Николс изјавил дека тоа било најтешкото филмско снимање во неговата кариера.

Огромното искуство на Кинг со филмски адаптации на неговите дела, и позитивни и негативни, го обликувало неговиот став кон целиот процес.

„Ги сакам филмовите, но кога станува збор за моите книги, мора да донесете одлука со себе: Дали сакате да ги продавате за филмови или не? Решив: Не ми е гајле дали ќе уништат сè и ќе направат ужасен филм, бидејќи книгата останува. Книгата е неуништлива“, изјави тој за „Гозба на стравот“.

И покрај значајната врска помеѓу филмскиот свет и неговата работа, Кинг е јасен за тоа каде му лежи срцето: „Јас сум книжевен човек. Филмовите се прекрасни, но тие не се висока уметност на начинот на кој мислам дека се книгите“.