Со преземањето на Кредит Свис, УБС може да укине до 30 отсто од работните места

УБС банката со преземањето на Кредит Свис (Credit Suisse) е подготвена да ја намали својата работна сила за 20-30 отсто, објави во неделата швајцарскиот дневен весник Tages-Anzeiger, цитирајќи неименуван висок менаџер на УБС.

УБС се согласи да го купи конкурентот Кредит Свис со седиште во Цирих за 3 милијарди швајцарски франци (3,3 милијарди долари) во зделка смислена од швајцарската влада, централната банка и регулаторот на пазарот за да се избегне колапс на финансискиот систем на земјата.

Но, договорот, кој исто така беше дизајниран да помогне да се обезбеди финансиска стабилност на глобално ниво, предизвика загриженост за големината на новата банка со средства од 1,6 билиони долари и повеќе од 120.000 вработени ширум светот.

Во извештајот се вели дека банката може да укине околу 11.000 работни места во Швајцарија.

Работните места во американското инвестициско банкарство, исто така, ќе бидат погодени, се вели во извештајот, при што УБС е подготвена да преговара за раскинување на договорот што ќе му даде на Мајкл Клајн, трговец од Вол Стрит, контрола врз голем дел од инвестициската банка Кредит Свис.