Силни дождови во Швајцарија предизвикаа свлечишта, осум лица се сметаат за исчезнати

Берн – Во Швајцарија неколку лица се водат како исчезнати во кантон Тичино на југоистокот на земјата, по свлечиште предизвикано од силни дождови што ја зафатија оваа алпска земја, соопшти полицијата.

„Големите бури предизвикаа свлечиште во регионот Фонтана и луѓе се пријавени како исчезнати“, се наведува во соопштението на полицијата без да изнесат дополнителни детали.

Спасувачките акции се особено тешки поради лошите временски услови, додаваат од полицијата. Апел за евакуација од куќите во близина на реката Маги е упатен рано утрово за жителите на Прат-Сорника и долината Маги, каде се бараат исчезнатите. Патиштата се пресечени, а камповите што се наоѓаат покрај реката се евакуирани, соопшти кантоналната полиција. Водата однесе мост и блокираше кантонален пат. Струјата е исклучена во делови од регионот, а дел од кантонот остана без питка вода, според федералниот систем за предупредување Swissalert. Голем дел од Швајцарија од вчера попладне беше погоден од силни грмежни невремиња проследени со многу обилни врнежи.

Излевањето на реката Рона и нејзините притоки, кои се зголемија поради силните дождови и топењето на снегот, принудија евакуација на неколку стотици луѓе и затворање на многу патишта, според локалните власти во Вале.

Земјата веќе минатиот викенд доживеа силни бури и исклучителни врнежи, кои однесоа животот на најмалку едно лице и предизвикаа значителна штета на југоистокот од земјата.