Семејство откри богатство од милион долари во дневната соба: „Ова е исклучително ретко откритие“

Мала мермерна скулптура за која се сметало дека е копија од дело на францускиот скулптор Огист Роден е всушност оригинал, кој е продаден за речиси милион долари на аукција, објавува Би-би-си.

Делото „Очај“ (Le Désespoir) прикажува жена со рацете околу колената држејќи се за едната нога. Создадено е во 1892 година, но по аукцијата во 1906 година, исчезнало.

На задоволство на сопственикот на „Очај“, било откриено дека станува збор за дело на Роден, чија автентичност ја потврдила група експерти посветени на проучување на делата на Роден (Comité Rodin).

Семејството во чиј посед се наоѓала статуетката го контактирало францускиот аукционер Ајмерик Руилак, а тој и неговиот тим го истражувале потеклото на делото. Скулптурата од 28,5 см со години стоела на семејното пијано.

Делото на Роден првично припаѓало на познатите „Пори на пеколот“ (La Porte de l’enfer) и, според Музејот Роден, евоцира жалост.

Според Музејот Роден, Роден имал намера да ги изложи „Пори на пеколот“ уште во 1889 година, но бидејќи сè уште не ја завршил монументалната скулптура, привремено престанал да работи на неа во 1890 година. Неколку пати се вратил на создавањето на величественото дело, правејќи измени сè до неговата смрт. Работел на „Порите“ повремено 37 години. Таа требало да го краси влезот во Музејот на декоративни уметности и да биде украсена со единаесет барелефи што ја претставуваат „Божествената комедија“ на Данте.

Според Музејот Орсеј, Роден бил инспириран од вратите што италијанскиот скулптор Лоренцо Гиберти ги направил за крстилницата во Фиренца во 15 век.